काठमाडौं । चक्रवर्ती हबी एजुकेशन एकेडेमीका अध्यक्ष देवेन्द्र भण्डारीमाथि आफ्नै छोराले खुकुरी प्रहार गरेका छन् । उनीमाथि सोमबार राति आफ्नै छोरा निरजको समूहले खुकुरी प्रहार गरेको हो । खुकुरी प्रहारबाट उनी गम्भीर घाईते भएका छन् । अहिले उनको नर्भिक अस्पतालमा उपचार भइरहेको छ ।

अध्यक्ष भण्डारीको परिवारभित्र उक्त कलेजको स्वामित्वबारे विवाद उत्कर्षमा पुगेको थियो । कलेजको स्वामित्व विवाद कम्पनी रजिष्ट्रार कार्यालय हुँदै अदालतसम्म पुगिसकेको छ । देवेन्द्रका छोरा निरजले आफूलाई कलेजको अध्यक्ष मान्दै आएका छन् । देवेन्द्र स्वयंले पनि आफूनै कलेजको अध्यक्ष भएको दाबी गर्दै आएका छन् ।

निरजले आफूलाई मंसिर १ गतेको सञ्चालक समितिको बैठकले क्याम्पस सञ्चालक समितिको अध्यक्षमा मनोनित गरेको दाबी गर्दै आएका थिए । सोही दाबी बमोजिम उनले सोको कार्यान्वयन हुनुपर्ने भन्दै क्याम्पसमा आफू समर्थित १५÷२० जना युवाहरु सहित हिजो आएर क्याम्पसभित्र प्रवेश गरेका थिए । उनले आफ्ना बाबु देवेन्द्रलाई कजेल प्रवेशमा समेत रोक लगाएका थिए । सोही क्रममा विवाद हुँदा उनी र उनका समर्थनमा आएका युवाहरुले देवेन्द्रमाथि खुकुरी प्रहार गरेका हुन् ।

देवेन्द्रको टाउकोमा गम्भीर चोट लागेको छ भने निरजलाई प्रहरीले नियन्त्रणमा लिएको छ । देबेन्द्रका परिवारका छ जना सदस्यको स्वामित्वमा उक्त कजेजको शेयर रहेको छ ।

जसमा देवेन्द्रको स्वामित्वमा दुई लाख कित्ता, निरमायाको स्वामित्वमा ५० हजार कित्ता शेयर रहेको छ । त्यसैगरी परिवारका अन्य सदस्यहरु नरमाया, निरज, अल्पना र स्वताको नाममा जनही ६२ हजार पाँच सय कित्ता शेयर रहेको छ ।

यसरी देवेन्द्र र निरमाया गरी दुई लाख ५० हजार र अन्य चार जनाको नाममा पनि सोही परिणाममा शेयर रहँदा विवाद झनै चुलिँदै आएको थियो ।