मेलम्चीको पानी धारामा आएन ? यी नम्बरमा गर्नुहोस् गुनासो

काठमाडौं । सरकारले गत सोमबार विधिवत् रूपमा काठमाडौं उपत्यकामा वितरण थालेको मेलम्ची खानेपानी तपाईंको धारामा नखसेर हैरान त हुनुहुन्न ? ठूलो पानी आएकाले थेग्न नसकेर कतै चुहावट पो भइरहेको छ कि ? धमिलो पानी आएकाले प्रयोग गर्ने कि नगर्ने भन्ने द्विविधा पनि पलाएको हुन सक्छ ।

मेलम्ची खानेपानी सम्बन्धमा उपभोक्ताको तर्फबाट आउन सक्ने यस्तै समस्यालाई मध्यनजर गरेर सरकारले समस्या समाधान सहजीकरण समिति गठन गरेको छ ।

खानेपानी मन्त्रालयले गत पुस २८ को मन्त्रीस्तरीय निर्णयबाट मेलम्ची खानेपानी विकास समितिका सिडिई पदमबहादुर कुँवरको संयोजकत्वमा चार सदस्यीय समिति गठन गरेको हो ।

समिति सदस्यमा काठमाडौं उपत्यका खानेपानी लिमिटेडका उपप्रबन्धक उमेशबाबु मरहठ्ठा, आयोजना कार्यान्वयन निर्देशनालयका सिडिई विकेश बधानथ्याचे र केयुकेएलका दीपेश ढकाल छन् ।

खानेपानी मन्त्रालयका अनुसार, मेलम्चीको खानेपानी सन्तुलित रूपमा वितरण भए/नभएको, पानी वितरणका क्रममा कुनै स्थानमा चुहावट भएको, पानी नआएकोलगायत समस्या उपभोक्ताले यो समितिसमक्ष राख्न सक्नेछन् ।

मन्त्रालयले समितिका संयोजक र सदस्यको मोबाइल नम्बर सार्वजनिक गर्दै मेलम्चीको खानेपानीसम्बन्धी कुनै समस्या आएमा तत्काल सम्पर्क गर्न उपभोक्तालाई आग्रह गरेको छ ।

मन्त्रालयले विश्व स्वास्थ्य संगठनको मापदण्डबमोजिम नै पानी प्रशोधन गरी प्रसारण गरिएको प्रष्ट पारेको छ । मेलम्चीको खानेपानी धमिलो आएपछि यसको शुद्धतामाथि प्रश्न उठेको छ ।

मन्त्रालयका अनुसार, मेलम्ची खानेपानीको पुराना वितरण लाइनहरू लामो समयसम्म सञ्चालन नहुँदा माटोका अवशेषका कारण धमिलो पानी धारामा पुगेको हो । फ्लसिङ गरिएकाले छिट्टै पाइपमा शुद्ध पानी प्रवाह हुनेछ ।

मेलम्ची खानेपानी सर्वसुलभ रूपमा उपत्यकाबासीको घर घरमा सन्तुलित र समानुपातिक हिसाबले वितरण गर्न प्रतिबद्धता पनि मन्त्रालयले व्यक्त गरेको छ ।