सर्लाहीमा १६ वर्षीया किशोरी आफ्नै कोठामा मृत भेटिइन्

सर्लाही । सर्लाहीमा एक किशोरी झुन्डिएको अवस्थामा मृत फेला परेकी छिन् । जिल्लाको लालबन्दी १६ (परवानीपुर) बस्ने ज्ञानबहादुर थापाकी १६ वर्षीया छोरी अन्जली शुक्रबार बिहान उनकै कोठामा मृत भेटिएकी हुन् । अञ्जलीले आत्महत्या गरेको हुन सक्ने प्रारम्भिक आशंका गरिएको छ ।

यद्यपी, आत्महत्याको कारण खुलेको छैन । परिवारले अञ्जली आफ्नै कोठामा सलको पासोमा झुण्डिएको बताएका छन् । अञ्जलीको शव पोष्टमार्टमको लागि प्रादेशिक अस्पताल मलंगवा लगिएको छ । घटनाका बारेमा पोष्टमार्टमपछि थप जानकारी प्राप्त हुने प्रहरी निरिक्षक हरिबोल केसीले बताए ।

प्रहरीका अनुसार अञ्जलीकी आमाले छोरीलाई पासोमा देखेपछि त्यसलाई खोलेकी थिइन् । त्यसपछि मात्रै परिवारले प्रहरीलाई खबर गरेका थिए । घटना शंकास्पद रहेको भन्दै प्रहरीले थप अनुसन्धान सुरु गरेको छ । अन्जली लालबन्दीस्थित जनज्योती उच्च माविमा कक्षा १२ मा पढ्दै थिइन् ।