टीआरसी विधेयक पास गर्न प्रचण्डले मागे सहयोग, अडान कायमै रहेको ओलीको जवाफ

काठमाडौं । प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीबीच भेटवार्ता भएको छ । आज बिहान प्रधानमन्त्री प्रचण्ड ले प्रमुख प्रतिपक्षी दलका नेता तथा पूर्व प्रधानमन्त्री ओलीलाई आफ्नो सरकारी निवासमा बोलाएर भेटवार्ता गरेका हुन् ।

दुई नेताबीचको भेटमा सोमबारबाट सुरु हुने संसद्को हिउँदै अधिवेशन र हिउँदे अधिवेशनबाट पास गर्ने विधेयकको बारेमा छलफल भएको थियो । सो भेटमा प्रचण्डले ओलीलाई सत्य निरुपण तथा मेलमिलाप सम्बन्धीको टीआरसी विधेय यसै अधिवेशनबाट पास गर्नेगरी अगाडि बढाउन लागिएको भन्दै सहयोग गर्न आग्रह गरेका छन् ।

भेटपछि ओलीले शान्ति प्रक्रियाका काम चाँडो टुंग्याउने विषयमा छलफल भएको जानकारी पत्रकारहरुलाई दिए । समसामयिक विषय र शान्ति प्रक्रियाका बाँकी कामहरु टुंग्याउने सन्दर्भमा छलफल भएको बताउँदै ओलीले भने, ‘खास यो विधेयकमा छलफल भइराख्या छ समितिमा, त्यसलाई राम्ररी मिलाएर छिटै टुंग्याऔं भन्ने विषयमा छलफल भयो।’

प्रधानमन्त्री प्रचण्डले टीआरसी विधेयक जतिसक्दो छिटो टुंग्याउन खोजपनि अध्यक्ष ओलीका अनुसार एमालेले एमालेले लिएको अडान कायमै रहेको छ । ‘हाम्रो अडान यथावत् नै छ’, अध्यक्ष ओलीले भने, ‘बहुमतले किन पास गर्नुपर्‍यो रु राम्रो बनाएर सहमतिले पास गरे भैगो नि!’

सरकारले सोमबारबाट सुरु हुने हिउँदे अधिवेशनमा ७३ वटा कानून निर्माण गर्न मस्यौदा बनाउँदैछ । हाल संसद्को कानून न्याय तथा मानव अधिकार समितिको उपसमितिमा बिचाराधीन अवस्थामा रहेको टीआरसी विधेयक लामो समयदेखि सत्तापक्ष र प्रतिपक्षी दलबीच कुरा नमिल्दा अघि बढ्न सकेको छैन् ।