लिङ्देनको तयारी खेर गयो, दुर्गा प्रसाईद्धारा राप्रपा प्रवेशको प्रस्ताव अस्विकार

काठमाडौं । राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईले आफू राष्ट्रिय प्रजातन्त्र पार्टीमा नलाग्ने बताएका छन् । आज (बुधबार) पत्रकार सम्मेलन गरी उनले आफू एमालेमा जान्छु भन्ने कुरा कल्पनाबाहिरको कुरा भएको बताए । ‘दुर्गा प्रसाई राप्रापामा भित्रिन्छ भन्ने कल्पना बाहिरको कुरा । म एमालेको केन्द्रीय सदस्य छँदैथिए नी । त्यो भन्दा त अलि गतिलो पार्टी हो नि त,’– उनले भने ।

राप्रपाले प्रसाई नेतृत्वको अभियानसँग कार्यगत एकता गर्दै आफ्ना एजेण्डा स्थापित गराउन दुवै टिमले सहकार्य गनुपर्ने निष्कर्षसहित वार्ता टोली बनाएको थियो । रापपा अध्यक्ष राजेन्द्र लिङ्देनले प्रसाईसँग वार्ता गर्न महामन्त्री डा।धवल शमसेर राणा र उपाध्यक्ष हेमजंग गुरुङ रहेको टोली गठन गरेका थिए ।

प्रसाईले भने राप्रपाको उक्त प्रस्ताव अस्वीकार गरेका छन् । उनले आफूले पार्टी बनाउन चाहेको भए राप्रपा भन्दा ठूलो पार्टी बनाउन सक्ने बताए । आफू पार्टी बनाउने भन्दा पनि पीडित, शोषित जनताको मुक्तिका लागि काम गरिरहेको बताए ।

प्रसाईले राप्रपामा आफू जाने त के राप्रपाका मानिसहरु आफ्नो अभियानमा समेत नल्याउने बताए । राप्रपाले आफूले नेतृत्व गरेको आन्दोलन विथोल्न खोजेको उनको भनाइ छ । राप्रपासँग आफ्नो वार्ता नहुने उनले बताए । ‘यिनीहरुसँग वार्ता हुँदैन । तिनीहरुसँग छ र के वार्ता गर्नु ? दुर्गा प्रसाई राप्रपामा जान्छ ? त्यो कल्पनाको कुरा हो । त्यो भन्दा राम्रो पार्टी बनाउँछ नि पार्टी बनाउन परे । अहिले पार्टीको आवश्यकता होईन नि,’– उनले भने ।