कुलेखानी-फाखेल सडकखण्ड आजदेखि खुल्यो, सतुङ्गल हुँदै कुलेखानी जोड्ने सडक बन्द

काठमाडौं । कुलेखानी फाखेल सडकखण्ड आजदेखि खुलेको छ । स्तरोन्नतिका लागि गएको पुस १६ गतेदेखि यो सडक खण्डमा गाडी सञ्चालनमा रोक लगाइएको थियो ।

कुलेखानी–फाखेल–हुमाने–फर्पिङ सडकखण्ड बाग्मती प्रदेशको राजधानी हेटौँडालाई सङ्घीय  राजधानी काठमाडौंसँग जोड्ने छोटो मार्ग हो ।

यसैबीच, मकवानपुर भएर काठमाडौं जोड्ने अर्को छोटो दुरीको कुलेखानी–महालक्ष्मी खोला–चखेल–देउराली–मातातीर्थ–सतुङ्गल सडकखण्ड हिजोदेखि एक हप्ताका लागि बन्द गरिएको छ ।

यो सडक खण्डमा रोलर ग्रेडर सहितको सबवेस राख्ने काम भइरहेकाले एक हप्ताका लागि गाडी सञ्चालनमा रोक लगाइएको इन्द्रसरोवर गाउँपालिका वडा नम्बर ५ का वडाध्यक्ष दुतराज तितुङले जानकारी दिए ।