काठमाडौं ।
पाँचथर, याङवरक गाउँपालिका-३ बानियाडाँडास्थित सामुदायिक वनमा मंगलबार दिउँसो लागेको आगो फैलिएर सोही ठाउँ बस्ने ईन्दिरा बराईलीको घर र गोठमा समेत आगलागी हुँदा घर र गोठ पूर्णरूपमा जलेर करिब ११ लाख रूपैयाँ बराबरको धनमाल नष्ट भएको नेपाल प्रहरीले बताएको छ । प्रहरीका अनुसार, भोजपुर नगरपालिका-२ चङखुले बस्ने ३४ वर्षीय युवराज राईको घरमा सोलारको तार सर्ट भई मंगलबार दिउँसो आगलागी हुँदा घर पूर्णरूपमा जलेर करिब ९ लाख रूपैयाँ बराबरको धनमाल नष्ट भएको छ ।
यसैगरी धादिङ, सिद्धलेक गाउँपालिका-२ कुवापानीटारस्थित आरबोटे सामुदायिक वनमा मंगलबार साँझ लागेको आगो फैलिएर सोही ठाउँ बस्ने ७० वर्षीय हर्क बहादुर श्रेष्ठको गोठ र कुखुरा फर्ममा समेत आगलागी हुँदा २ वटा गोठ, कुखुरा फर्म, मोटरसाइकल १ थान, हाते ट्याक्टर १ थान र टिभी १ थान जलेर नष्ट भएको नेपाल प्रहरीले बताएकोे छ ।
प्रहरीका अनुसार , कैलाश गाउँपालिका-७ बिथली बस्ने इमानसिङ प्रजाको घरमा मंगलबार राति आगलागी भई सोही ठाउँ बस्ने प्रतापसिङ प्रजाको घरमा समेत आगलागी हुँदा दुवै जनाको घर पूर्णरूपमा जलेर करिब १० लाख रूपैयाँ बराबरको धनमाल नष्ट भएको छ । प्रहरीले स्थानीय बासिन्दाको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको बताइएको छ ।
