काठमाडौं । काठमाडौंबाट गोरखा जाँदै गरेको ट्याक्सी मुग्लिन नजिकै त्रिशूली नदीमा खस्दा पाँच जनाको मृत्यु भएको छ । जिल्ला प्रहरी कार्यालय चितवनका अनुसार पाँच जनाको शव फेला परेको हो । तीन महिला, एक पुरुष र एक बालकको शव भेटिएको छ । तर, उनीहरूको परिचय खुलेको छैन ।

चितवनको इच्छाकामना गाउँपालिका ५ स्थित पृथ्वी राजमार्गको सिमलधारा नजिक शनिबार बिहान सवा ७ बजे बा २ ज ४१९६ नम्बरको ट्याक्सी सडकबाट त्रिशूली नदीमा खसेको हो। ट्याक्सीमा कति यात्री सवार थिए भन्ने यकिन नभएको प्रहरीले जनाएको छ। गोताखोर टोली परिचालन गरी ट्याक्सी निकाल्ने तयारी भइरहेको छ ।