छुट्टाछुट्टै सवारी दुर्घटनामा दुई जनाको मृत्यु

काठमाडौं । प्युठान नगरपालिका-१ धरमपानीस्थित सडकमा खैराकोटबाट क्वाडीतर्फ जाँदै गरेको रा.१ त २४०१ नम्बरको खाली ट्याक्टरबाट लडेर चालक सोही नगरपालिका-३ साढेखोला बस्ने ३० वर्षीय जुद्ध बहादुर कुमालको सोमबार साँझ मृत्यु भएको नेपाल प्रहरीले बताएको छ । लडेर गम्भीर घाइते भएका उनको जिल्ला अस्पताल बिजुवारमा उपचारको क्रममा मृत्यु भएको प्रहरीले जनाएको छ ।

प्रहरीका अनुसार वीरगंज महानगरपालिका-११ श्रीपुरस्थित सडकमा भारतबाट ड्राईपोर्टको बाटो हुँदै कलैयातर्फ जाँदै गरेको बिआर २५ जिए ०४२५ नम्बरको धान लोड गरेको ट्रकबाट खसेर ट्रकका सहचालक भारत बिहार राज्य जहमावाद बस्ने ५५ वर्षीय महेश माझीको सोमबार राति मृत्यु भएको छ । खसेर गम्भीर घाइते भएका उनको नारायणी अस्पताल विरगंजमा उपचारको क्रममा मृत्यु भएको छ । ट्रक चालकलाई प्रहरीले नियन्त्रणमा लिएको प्रहरीले जनाएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको बताइएको छ ।