सर्लाही । सर्लाहीको लालबन्दीस्थित निर्माणाधीन रेल्वे ट्रयाकमा गएराति मोटरसाइकल दुर्घटना हुँदा चालकको ज्यान गएको छ । लालबन्दी नगरपालिका ४ जरुवा पानी नजिकको निर्माणाधीन रेल्वे ट्रयाकमा दुर्घटना भएको हो ।

ज ११ प ७५४८ नम्बरको मोटरसाइकल अनियन्त्रित भई तल खस्दा चालक लालबन्दी नगरपालिका ३ जब्दीका ५० वर्षीय राजकुमार चौधरीको ज्यान गएको हो । राति ८:५० बजेतिर मोटरसाइकल पल्टिएको अवस्थामा चौधरीलाई स्थानीयले उद्धार गरी लालबन्दी बजारस्थित मोडेल अस्पताल पुर्‍याएका थिए ।

अस्पतालमा पुर्‍याए लगत्तै चौधरीलाई चिकित्सकले मृत घोषणा गरेको इलाका प्रहरी कार्यालय लालबन्दीले जनाएको छ । मृतक चौधरीको शव पोस्टमार्टमका लागि राति नै प्रादेशिक अस्पताल मलंगवा लगेर राखिएको छ ।