मोटरसाइकल दुर्घटना हुँदा बुवाको मृत्यु, छोरा घाइते

सर्लाही । सर्लाहीको बागमतीमा छोराले चलाएको मोटरसाइकल दुर्घटना हुँदा बुवाको मृत्यु भएको छ । दुर्घटना मोटरसाइकल चालक युवक पनि घाइते भएका छन् । पूर्वपश्चिम राजमार्गमा पर्ने बागमती नगरपालिका १ मिलनचोकमा बा ९१ प ९३६२ नम्बरको मोटरसाइकल आफैँ अनियन्त्रित भई दुर्घटनामा परेको प्रहरीले जनाएको छ ।

दुर्घटनामा बाराको कोल्हबी नगरपालिका १ का ६५ वर्षीय निलबहादुर प्रसाइँको मृत्यु भएको जिल्ला प्रहरी कार्यालय सर्लाहीका डीएसपी दीपक श्रेष्ठले जानकारी दिए । दुर्घटनामा गम्भीर घाइते भएका उनको उपचारको क्रममा बाराको एलएस न्युरो अस्पतालमा आज बिहान मृत्यु भएको हो । दुर्घटनामा निलबहादुरका छोरा मोटरसाइकल चालक ३६ वर्षीय राजु प्रसाईं पनि घाइते भएका छन् । उनको एलएस अस्पतालमै उपचार भइरहेको प्रहरीले जनाएको छ।