काठमाडौं । गए रातिदेखिको लगातारको वर्षाका कारण आएको पहिरोमा पुरिएर पोखरामा एकै परिवारका सात सहित ११ जनाको मृत्यु भएको छ । पोखरा महानगरपालिका १९ तल्लोकोटमा एकै परिवारका सात जना पहिरोमा पुरिएर मृत्यु भएको जिल्ला प्रहरी कार्यालय, कास्कीले जनाएको छ ।
त्यस्तै, पोखरा ३२ चैनपुरमा पहिरोमा पुरिएर तीन जनाको ज्यान गएको छ । बिहिबार राति सवा १० बजे तल्लोकोटमा पहिरोले एकतले ब्लकको गारो र टिनको छाना भएको घर पहिरोमा पुरिएको हो ।
घर पुरिँदा ४७ वर्षीय कुलबहादुर परियार, उनकी पत्नी ४३ वर्षीया मनकुमारी, आमा ८५ वर्षीया लक्षिमा, छोरी १५ वर्षीया प्रशना र २० वर्षीया प्रभा, ज्वाइँ २५ वर्षीय अस्मित परियार र आफन्त राधिका परियारको मृत्यु भएको जिल्ला प्रहरी कार्यालयका प्रहरी नायव उपरीक्षक (डीएसपी) बसन्तकुमार शर्माले बताए ।
प्रभा चितवनबाट माइती घर आएकी थिइन् । प्रभासँग भेटघाट गर्न छिमेकी राधिका पनि आएकी थिइन् । त्यस्तै, चैनपुरमा आरती ओझाको घर पहिरोले पुरिँदा छोरी १८ वर्षीया अनिता ओझा, ११ वर्षीया अनुष्का ओझा र भदै ९ वर्षीय प्रतीक सुवेदीको मृत्यु भएको प्रहरी नायव उपरीक्षक शर्माले बताए ।
