मलेसियामा औपचारिक रुपमा डोङफेङ बक्स ईभी लन्च

काठमाडौँ । मलेसियामा औपचारिक रुपमा डोङफेङ बक्स ईभी लन्च भएको छ । सन् २०२२ देखि इलेक्ट्रिक कमर्सियल भ्यान ईसी ३५ उपलब्ध भएको भए पनि सामान्य ग्राहकका लागि भने पहिलो ईभीको रुपमा यो गाडी हाल उपलब्ध भएको हो ।

डोङफेङ बक्स ई २ र ई ३ गरी दुई भेरिएन्टमा उपलब्ध हुने सो गाडीको मूल्य १ लाख ७ सय र १ लाख १३ हजार ७ सय आरएम छ । त्यसैगरी ह्वाइट अप्सनको मूल्य भने १ लाख १५ हजार ७ सय आरएम छ । डोङफेङ बक्स ईभीलाई नामी ०१ ईभी पनि भनिन्छ, जुन नेपाली बजारमा समेत उपलब्ध छ । नेपाली बजारमा नामी ई १, ई २ र ई ३ गरी तीन भेरिएन्टमा यो गाडी उपलब्ध छ ।

ई२ र ई ३ भेरिएन्टमा रहेको मुख्य फरक भनेको यसको ब्याट्री प्याक हो । ई २ मा ३१.४५ किलोवाट आवरको ब्याट्री प्याक रहेको छ, जसले ३३० किलोमिटरको सीएलटीसी रेन्ज दिन्छ । त्यसैगरी ई ३ मा ४२.३ किलोवाट आवरको ब्याट्री प्याक रहेको छ, जसले सिंगल चार्जमा ३४० किलोमिटरको सीएलटीसी रेन्ज दिन्छ । दुवै भर्सनको डोङफेङ बक्स गाडीमा ७० किलोवाटको इलेक्ट्रिक मोटर रहेको छ, जसले १६० एनएमको टर्क जेनेरेट गर्छ । यसको टप स्पिड १४० किलोमिटर प्रतिघण्टा छ ।

यी दुई भर्सनमा भएको अर्को फरक भनेको यसको चार्जिङ क्षमता हो । ई ३ को माथिल्लो भेरिएन्टमा स्ट्यान्डर्ड ६.६ किलोवाटको एसी अनबोर्ड चार्जर र तल्लो भेरिएन्टमा ३।३ किलोवाटको चार्जर उपलब्ध हुन्छ । डीसी चार्जिङ स्पिडमा पनि केही फरक छ । दुवै भेरिएन्टलाई ३० मिनेटमा ३० प्रतिशत देखि ८० प्रतिशत सम्म चार्ज गर्न सकिने कम्पनीले दावी गरेको छ । त्यसैगरी ई ३ मा लेवल २ अटोनोमस ड्राइभिङ सहितको एडास फिचर छ भने ई २ मा एडेप्टिभ क्रुज कन्ट्रोल रहेको छ ।

दुवै भेरिएन्टमा अटोमेटिक पार्किङ, १२.८ इन्चको इन्फोटेनमेन्ट सिस्टम, ५ इन्चको डिजिटल इन्स्ट्रयुमेन्ट स्क्रिन, दुई एयरब्याग, वायरलेस फोन चार्जर लगायतका विशेषता रहेका छन् ।