गोरखाको पद यात्रामा सावधान रहन सशस्त्र प्रहरीको आग्रह

काठमाडौँ । सशस्त्र प्रहरी बल नेपालले गोरखाको साम्दो ईलाकामा पर्ने पदमार्गमा यात्रा गर्दा साबधानी अपनाउन अनुरोध गरेको छ ।

चुमनुब्री–१ साम्दो क्षेत्रमा हाल ३ फिटसम्म हिउँ परेकोले सो पदमार्गमा यात्रा गर्ने पर्यटकहरुलाई सावधान रहन भनेको हो । केही दिन यता भएको भारी हिमपातले बाटोघाटो अबरुद्ध भएपछी बिओपी साम्दोले हिउँ पन्छाउने कार्य पनि निरन्तर गरिरहेको छ ।

यसैगरी उत्तरतर्फका पदमार्गका कतिपय ठाउँमा हाल सशस्त्र प्रहरी बल नेपालका बोर्डर आउट पोस्ट स्थापना भइसकेका र अन्य स्थानमा पनि बिओपी स्थापना गरिने योजना रहेकोले हाल रहेका बिओपी हरुले ती क्षेत्रमा बिपद् उद्वारलाई पनि उच्च प्राथमिकता राखेर कार्य गरिरहेको छ ।

हाल उत्तरतर्फ १० वटा बिओपी रहेकोमा प्रत्येक १० किलोमिटरमा स्थापना गर्ने संगठनको दिर्घकालिन लक्ष्य रहेको छ । हिमाली क्षेत्रमा आवतजावत गर्दा कुनै समस्या भएमा र सुचनाको लागि सशस्त्र प्रहरी बल नेपालको हटलाईन नम्बर १११४ मा फोन गर्न समेत अनुरोध गरिएको छ ।