भोजपुर । भोजपुरको प्रतिष्ठित आठौँ अन्तर्राष्ट्रिय आमन्त्रित मेयर गोल्डकप प्रतियोगिता यही वैशाख १४ देखि २० गतेसम्म सञ्चालन हुने भएको छ ।

भोजपुर– ७ कोदारस्थित रङ्गशालामा सञ्चालन हुने प्रतियोगितामा भारतको एकसहित नेपालका सात टिमले सहभागिता जनाउने छन् ।

प्रतियोगितामा जर्जियन फुटबल क्लब भारतसहित सशस्त्र प्रहरी बल नेपाल, चर्च ब्वाइज युनाइटेड, एलएक्स सिटी मोरङ, भगवती स्पोर्ट्स क्लब खोटाङ, नवोबुद्ध फुटबल क्लब सप्तरी, सलहेश फुटबल क्लब सिरहा र आयोजक भोजपुर जिल्ला फुटबल सङ्घले सहभागिता जनाउने आयोजकले जनाएको छ ।

प्रतियोगिताका विजेता तथा उपविजेताले उपाधिसहित क्रमशः नगद पाँच लाख र तीन लाख रुपैयाँ पाउने छन् । अन्य व्यक्तिगत विधातर्फ पनि सर्वोत्कृष्ट खेलाडी, सर्वाधिक गोलकर्ता, उत्कृष्ट गोलरक्षकलाई पुरस्कारको व्यवस्था गरिएको आयोजक जिल्ला फुटबल सङ्घका अध्यक्ष प्रवीण सुवालले जानकारी दिए ।

गत वर्ष भएको सातौँ संस्करणमा चर्च ब्वाइज युनाइटेड विजेता र त्रिभुवन आर्मी क्लब उपविजेता बनेका थिए ।