म्याड्रिड । सोमबार युरोपका धेरै देशमा  ब्ल्याकआउट भएको खबर आएको छ । स्पेन, पोर्चुगल र फ्रान्सका धेरै क्षेत्रमा विद्युत आपूर्ति ठप्प भएको छ । स्थानीय मिडियाका अनुसार ब्ल्याक आउटले महत्वपूर्ण पूर्वाधारमा अवरोध पुर्याएको छ। विद्युत् कटौतीका कारण हवाई र मेट्रो सेवा ठप्प भएको छ ।

म्याड्रिडदेखि लिस्बनसम्मको ठूलो जनसंख्या अन्धकारमा डुबेको छ। जसका कारण सर्वसाधारणले निकै सास्ती खेप्नु परेको जनाइएको छ । यो आपतकालको सामना गर्न, प्रोटोकलहरू तुरुन्तै लागू गरिएको छ। साथै यसको कारणबारे पनि अनुसन्धान भइरहेको छ ।

यो साइबर आक्रमण पनि हुन सक्ने अनुमान गरिएको छ । प्रभावित सहरहरूमा म्याड्रिड, बार्सिलोना, लिस्बन, सेभिल र पोर्टो जस्ता प्रमुख औद्योगिक केन्द्रहरू पर्छन्।

स्थानीय सञ्चारमाध्यमका अनुसार विद्युत् कटौतीका कारण धेरै सेवा, रेल स्टेशन र विमानस्थल पनि नराम्ररी प्रभावित भएका छन् । स्पेनको ट्राफिक प्राधिकरण डिजिटीले नागरिकहरूलाई विद्युत कटौतीको कारण आवश्यक बाहेक आफ्नो सवारी साधन प्रयोग नगर्न आग्रह गरेको छ।

ट्राफिक बत्तीहरू बन्द गरिएका छन् र मेट्रो सेवाहरू रोकिएका छन्, जसले सडकहरूमा अराजकता सिर्जना गरेको छ। अस्पतालहरूमा ब्याकअप जेनेरेटरको सहयोगमा अत्यावश्यक सेवाहरू सञ्चालन भइरहेका छन् तर अधिकारीहरूले अस्पतालका कर्मचारीहरूलाई कम्प्युटरहरू बन्द गर्न र विद्युत बचत गर्न अन्य उपायहरू गर्न निर्देशन दिएका छन्।

यसैबीच, स्पेनको अवस्थालाई सम्हाल्न संकट व्यवस्थापन समिति गठन गरिएको छ। स्पेनी रेडियो स्टेशनहरूले रिपोर्ट गरेका छन कि म्याड्रिड भूमिगत रेल सेवा खाली भइरहेको छ। क्याडर सेर रेडियो स्टेशनले रिपोर्ट गर्यो कि म्याड्रिड सिटी सेन्टरमा ट्राफिक जाम भएको थियो किनभने ट्राफिक लाइटहरू काम गरिरहेका थिएनन्।

स्पेनको पावर ग्रिड अपरेटर कम्पनी ‘रेड इलेक्ट्रिका’ले ब्ल्याकआउटको पुष्टि गर्दै यो समस्याले देशलाई असर गरिरहेको बताएको छ । सरकार र ग्रिड अपरेटर रेड इलेक्ट्रिकाले आउटेजको कारण पत्ता लगाउन प्रयास गरिरहेको छ। स्पेनी अपरेटरले ट्विटरमा भने कि ‘ब्याकअप योजना बनाइएको छ, यो एक व्यापक युरोपेली समस्या हो। देशभर विद्युत् आपूर्ति सुचारु गर्न क्षेत्रीय कम्पनीहरूसँग मिलेर धेरै ठोस कदम चालिएको छ।’

यसबाहेक पोर्चुगलको ग्रिड अपरेटर ‘इ–रेडिज’ले पनि युरोपेली पावर ग्रिडमा समस्याका कारण यो संकट उत्पन्न भएको बताएको छ। ‘रेड इलेक्ट्रिक’ले देशको उत्तरी र दक्षिणी क्षेत्रमा विद्युत् पुनःस्थापनाको काम शुरु भएको पनि जानकारी दिएको छ । कम्पनीले यसलाई ‘महत्वपूर्ण कदम’ भन्दै पूर्ण पुनर्स्थापनातर्फ तीव्र गतिमा काम भइरहेको बताएको छ । म्याड्रिडमा ट्राफिक लाइटहरू बन्द गरिएका छन्, जसले सडक यातायातमा ठूलो अवरोध सिर्जना गरेको छ। साथै, भूमिगत रेल प्रणालीका केही भागहरू खाली गरिएको छ।

यस अवधिमा म्याड्रिड ओपन टेनिस प्रतियोगिताको खेल बिचमै रोकिनु परेको थियो, जसका कारण बेलायती खेलाडी ज्याकब फर्नले सहित धेरै खेलाडीले कोर्ट छोड्नु परेको थियो । एक्कासी विद्युत् चुहिँदा स्कोरबोर्ड र कोर्ट क्यामेराले पनि काम गर्न छाडेको थियो । स्पेनको सार्वजनिक प्रसारणकर्ता आरटिभीइले स्थानीय समय अनुसार दिउँसो १२ः३० बजे देशका विभिन्न क्षेत्रहरूमा बिजुली गएको हो र यसको न्यूजरूम, म्याड्रिडको स्पेनी संसद र देशभरका मेट्रो स्टेशनहरू अन्धकारमा डुबेको थियो ।