महोत्तरीको मनरास्थित पोखरीमा डुबेर दुई बालकको निधन

महोत्तरी । महोत्तरी जिल्लाको मनरा शिसवा नगरपालिका १ स्थित ब्रह्मस्थान नजिकैको पोखरीमा डुबेर दुई बालकको मृत्यु भएको छ । सोमबार साँझ डुबेर अशक्त बनेका उनीहरूको उपचारका क्रममा सोमबार राति मृत्यु भएको हो ।

मृतकहरूमा सोही ठाउँ निवासी विकेश सिंहका १० वर्षीय छोरा शुभम कुमार सिंह र सप्तरी डाक्नेश्वरी नगरपालिका ९, पथरघाटा लक्ष्मीपट्टी गाउँका रूपेश सिंहका ९ वर्षीय छोरा आयुष कुमार सिंह रहेका छन्।

डुबेको अवस्थाबाट उद्दार गरी तत्कालै मनरा नगर अस्पतालमा उपचारका लागि लगिए पनि दुवै बालकको ज्यान जोगाउन सकिएन । घटना बारे विस्तृत अनुसन्धान भइरहेको जिल्ला प्रहरी कार्यालय महोत्तरीले जनाएको छ ।