एनएमबि बैंक लि. द्धारा माथिल्लो मैवा जलविद्युत आयोजनाको वित्तीय व्यवस्थापन

काठमाडौं । ताप्लेजुङको मैवाखोला तथा मेरिङदेन गाउँपालिकामा निर्माण हुन लागेको १७.८५ मेगावाट क्षमताको माथिल्लो मैवा खोला जलविद्युत आयोजनामा एनएमबि बैंक लिमिटेडले ऋण लगानी गर्ने भएको छ ।

यस सम्बन्धमा एनएमबि बैंक लि. र काङ हाइड्रोपावर कम्पनी लि बीच वित्तीय व्यवस्थापन सम्पन्न भएको छ । एनएमबि बैंकको तर्फबाट चिफ, सस्टेनेबल ईनर्जी बैंकिङ्गका दिनेश दुलाल र काङ हाइड्रोपावर कम्पनीका प्रबन्ध निर्देशक गणेश प्रसाद सुब्बाबीच ऋण सम्झौतामा हस्ताक्षर गरिएको हो । हस्ताक्षरपछि बैंकका प्रमुख कार्यकारी अधिकृत (सीईओ) गोविन्द घिमिरे र कम्पनीका प्रबन्ध निर्देशक सुब्बाले सम्झौता पत्र आदान–प्रदान गरेका थिए ।

कार्यक्रममा एनएमबि बैंकका सीईओ घिमिरेले आयोजना तोकिएको लागत र समयसीमा भित्रै सम्पन्न गर्न र निर्माणका क्रममा प्राविधिक, वातावरणीय तथा सामाजिक पक्षको यथोचित व्यवस्थापन गर्न आग्रह गरे । उनले आयोजनाको दीर्घकालीन स्थायित्वका लागि यी पक्षमा विशेष ध्यान दिनुपर्ने धारणा व्यक्त गरे ।

कम्पनीका प्रबन्ध निर्देशक सुब्बाले आयोजनाको समयमै सम्पन्नता सुनिश्चित गर्ने प्रतिबद्धता जनाउँदै एनएमबि बैंकलाई धन्यवाद ज्ञापन गरे ।

एनएमबि बैंकले हालसम्म ५० भन्दा बढी जलविद्युत आयोजना निर्माणका लागि लगानी गरिसकेको छ । वातावरणीय तथा सामाजिक जोखिम व्यवस्थापनका लागि नेपाल राष्ट्र बैंकले जारी गरेको Environmental and Social Risk Management, 2022 को निर्देशनअनुसार एनएमबि बैंकले आफ्नो वातावरणीय तथा सामाजिक नीति तयार गरेको छ । सोहीअनुसार बैंकले वातावरणीय तथा सामाजिक व्यवस्थापन प्रणाली लागू गरी जलविद्युत आयोजना सञ्चालनका क्रममा हुने सम्भावित असरहरुको समुचित व्यवस्थापन गर्दै आएको छ ।