आठ जटिल रोगका विरामीका लागि स्वास्थ्य विमा सुविधा दुई लाख

काठमाडौं । स्वास्थ्य तथा जनसंख्यामन्त्री प्रदीप पौडेलले स्वास्थ्य बिमा कार्यक्रमअन्तर्गत ८ प्रकारको जटिल रोगहरुमा विमा रकम बढाएर दुई लाख पुर्याएको बताएका छन् । मन्त्री पौडेलले आफ्नो पूर्वप्रतिबद्धताअनुसार आठ जटिल रोगका बिरामीले हाल पाइरहेको एक लाख उपचारमा थप एक लाख गरी दुई लाख सुविधा प्राप्त गर्न सक्ने बताएका हुन् ।

‘कडा रोग लागेर स्वास्थ्य उपचारका लागि खर्च जुटाउन नसकेर समस्या भोगिरहेका नागरिकको पीडामा राहत दिने सोचका साथ साउन १ गतेबाट ८ प्रकारका बिरामीले हाम्रो पूर्वप्रतिबद्धताअनुसार स्वास्थ्य बीमा कार्यक्रममार्फत २ लाखको उपचार प्राप्त गर्ने व्यवस्था गरेका छौं,’– उनले भनेका छन् ।

अब क्यान्सर, मुटु, मृगौला, हेड इन्जुरी, स्पाइनल इन्जुरी, सिकलसेल एनिमिया, पार्किन्सोनिजम र अल्जाइमरका बिरामीले विमामार्फत दुई लाखसम्मको सुविधा लिनसक्ने मन्त्री पौडेलको भनाइ छ । स्वास्थ्य बीमालाई थप परिस्कृत गर्दै आम नागरिकको पहुँच अभिवृद्धि गराउन आफू निरन्तर प्रयत्नशील रहेको पनि उनले बताएका छन् ।