काठमाडौं । सरकारले श्रमिकको न्यूनतम पारिश्रमिक वृद्धि गर्दै १९ हजार ५५० रुपैयाँ पुर्‍याएको छ। सरकार, रोजगारदाता तथा ट्रेड युनियनबीच भएको त्रिपक्षीय सहमतिपछि चिया बगानबाहेकका सबै क्षेत्रका श्रमिकका लागि यो नयाँ दर लागू गरिएको हो।

नयाँ संरचना साउन १ गतेदेखि लागू भइसकेको छ। अब श्रमिकले न्यूनतम १२ हजार १७० रुपैयाँ आधारभूत तलब र ७ हजार ३८० रुपैयाँ महँगी भत्ता प्राप्त गर्नेछन्। यसअघि १७ हजार ३ सय रुपैयाँ रहेको तलब संरचना अहिले २ हजार २५० रुपैयाँले बढेको हो।

प्रतिघण्टाको हिसाबले हेर्दा अब श्रमिकले न्यूनतम १०१ रुपैयाँ पाउनेछन्, जसमा ६३ रुपैयाँ आधारभूत तलब र ३८ रुपैयाँ महँगी भत्ता हुनेछ। आंशिक वा घण्टे काम गर्ने श्रमिकहरूलाई यही दरमा पारिश्रमिक दिइनेछ।

त्यस्तै, दैनिक ज्यालामा काम गर्ने श्रमिकका लागि पनि नयाँ दर लागू गरिएको छ। उनीहरूले अब न्यूनतम ७५४ रुपैयाँ पाउनेछन्, जसमा ४७० रुपैयाँ आधारभूत तलब र २८४ रुपैयाँ महँगी भत्ता हुनेछ। चिया बगानमा कार्यरत श्रमिकहरूको तलब दर भने अझै टुंगो लागेको छैन। सरोकारवाला निकायहरूसँग छलफलपछि त्यसको टुंगो लगाइने जनाइएको छ।