काठमाडौं । नेपाल राष्ट्र बैंकले १० वटा वाणिज्य बैंकको कर्जा गुणस्तर परीक्षण (लोन पोर्टफोलियो रिभ्यु) गर्ने भएको छ । यसका लागि राष्ट्र बैंकले बंगलादेशी कम्पनी हउलादार युनुस एन्ड कम्पनी चार्टर्ड एकाउन्टेन्ट्ससँग करिब ६२ लाख ५४ हजार रुपैयाँ लागतमा सम्झौता गरेको हो।
सम्झौताअनुसार कम्पनीले पाँच महिनाभित्र लेखापरीक्षण सम्पन्न गर्नुपर्नेछ । यसअन्तर्गत राष्ट्रिय वाणिज्य, ग्लोबल आईएमई, नेपाल इन्भेष्टमेन्ट मेगा, नबिल, कुमारी, लक्ष्मी सनराइज, हिमालयन, एनएमबी, प्रभु र एनआईसी एसिया गरी १० वटै बैंकको कर्जा पोर्टफोलियो परीक्षण गरिनेछ ।
यसअघि अन्तर्राष्ट्रिय मुद्रा कोष (आईएमएफ)ले नेपाललाई उपलब्ध गराएको विस्तारित कर्जा सुविधाअन्तर्गत १० ठूला वाणिज्य बैंकहरुको लोन पोर्टफोलियो रिभ्यु गर्न सुझाव दिएको थियो । त्यसअनुसार राष्ट्र बैंकले बोलपत्र आह्वान गर्दा सर्वाधिक अंक प्राप्त गरेको हउलादार कम्पनीले काम पाएको हो ।
नेपालका बैंकहरूले ठूलो मात्रामा ऋण प्रवाह गरेका कारण उनीहरूको लगानी कस्तो क्षेत्रमा गएको छ र त्यसको अवस्था के छ भन्ने बुझ्न गुणस्तर परीक्षण गरिन्छ । यसले बैंकको सम्पत्ति र कर्जाको वास्तविकता पत्ता लगाएर सम्भावित जोखिम न्यूनिकरण गर्ने अवसर दिन्छ ।
ठूला बैंकको परीक्षणपछि सम्पूर्ण बैंकिङ क्षेत्रको तस्वीर देखिने भएकाले समयमै जोखिम व्यवस्थापन गर्न सजिलो हुने अपेक्षा छ । यसअघि पनि सन् २०१५ मा यस्तै समीक्षा भएको थियो, जसपछि नेपाल राष्ट्र बैंकले बैंक तथा वित्तीय संस्थालाई मर्जर र प्राप्तिमा लैजाने नीति लागू गरेको थियो।
