काठमाडौं । आइतबारको शेयर बजार दिनभर उतार–चढावबीच अन्त्यमा केही सुधार देखिएको छ। नेपाल स्टक एक्सचेञ्ज (नेप्से) ५.१९ अंकले बढ्दै २५०९.०४ बिन्दुमा बन्द भएको छ। बजार सुरुवातदेखि नै राताम्य यात्रा गरिरहेको भए पनि अन्तिम समयमा लगानीकर्ताको क्रय दबाब बढेपछि बजार हरियोमा फर्किएको हो।

आज ३१३ कम्पनीका ५५ लाख ९६ हजार ७७ कित्ता शेयर किनबेच हुँदा २ अर्ब ६६ करोड १३ लाख रुपैयाँ बराबरको कारोबार भएको नेप्सेले जनाएको छ। यद्यपि बजार बढेपनि ८ उपसूचक राताम्य भएका छन्। यसदिन वाणिज्य बैंक समूह ०.३५ प्रतिशत, विकास बैंक ०.२९ प्रतिशत, फाइनान्स समूह ०.७२ प्रतिशत र होटल तथा पर्यटन समूह ०.५७ प्रतिशतले घटेका छन्।

आज ९८ कम्पनीको शेयर मूल्य बढेको छ भने १४६ कम्पनीको घटेको छ। विश्लेषकहरूको भनाइमा, राजनीतिक अस्थिरता र आर्थिक जोखिमको आशंका का कारण लगानीकर्ताको मनोबल कमजोर बनेको छ, जसले बजारमा अनिश्चितता थपेको छ। लगानीकर्ताहरू अझै पनि स्थिरता र विश्वासिलो लगानी वातावरणको खोजीमा रहेका छन्।