डिजिटल भुक्तानी निरन्तर वृद्धि, दुई महिनामा ६ खर्ब ५७ अर्ब नाघ्यो

काठमाडौं । चालु आर्थिक वर्ष २०८२/८३ का पहिलो दुई महिना (साउन र भदौ) मा डिजिटल भुक्तानी प्रणालीको प्रयोगमा उल्लेखनीय वृद्धि भएको छ। नेपाल राष्ट्र बैंकका ताजा तथ्यांकअनुसार डेबिट कार्ड, मोबाइल बैंकिङ र क्युआर (QR) कोडमार्फत गरिएको कारोबारको कुल रकम ६ खर्ब ५७ अर्ब ७० करोड रुपैयाँ पुगेको छ।

राष्ट्र बैंकका अनुसार सो अवधिमा डेबिट कार्ड प्रयोगकर्ताहरूले १ करोड ८ लाख कारोबारमार्फत ८७ अर्ब ३२ करोड रुपैयाँ बराबरको भुक्तानी गरेका छन्।

त्यसैगरी, मोबाइल बैंकिङ सेवामार्फत ६ करोड २५ लाख कारोबार भई कुल ४ खर्ब ६८ अर्ब १५ करोड रुपैयाँ बराबरको कारोबार भएको छ। यस्तै, क्युआर कोड भुक्तानी प्रणालीमार्फत ४ करोड १० लाख कारोबार गरी १ खर्ब १ अर्ब २३ करोड रुपैयाँ बराबरको कारोबार सम्पन्न भएको राष्ट्र बैंकले जनाएको छ।

डिजिटल भुक्तानी माध्यमको तीव्र विस्तार र जनस्तरमा बढ्दो पहुँचका कारण इलेक्ट्रोनिक कारोबारको मात्रा पछिल्ला महिनाहरूमा निरन्तर वृद्धि भइरहेको बैंकको मूल्यांकन छ।