पर्सा । शीतलहरसँगै बढेको चिसोको कारण वीरगञ्ज महानगरपालिकाले ५ दिन विद्यालय बन्द गर्ने निर्णय गरेको छ । चिसोले बालबालिकाको स्वास्थ्यमा पर्न सक्ने असरलाई दृष्टिगत गर्दै महानगरले सामुदायिक र संस्थागत विद्यालय ५ दिन बन्द गर्ने निर्णय गरेको हो ।
महानगरपालिकाको कार्यालयले सोमबार सूचना जारी गर्दै पुस ७ गतेदेखि ११ गतेसम्म पाँच दिनका लागि सम्पूर्ण विद्यालयमा पठन पाठन स्थगित गरिएको जनाएको छ ।
महानगरपालिकाको शैक्षिक प्रशासन महाशाखाले सूचना जारी गर्दै हालको बिदा वर्षे बिदाबाट कट्टा हुने गरी दिइएको जनाएको छ । सूचनामा विद्यालयहरू पुन: पुस १३ गते आइतबारदेखि नियमित रूपमा सञ्चालन हुने जनाइएको छ ।
पुस १० गते क्रिसमसको सार्वजनिक बिदा भएको, पुस ११ गते शैक्षिक क्यालेन्डर अनुसार नै सट्टा बिदा रहेको र पुस १२ गते शनिबार परेकाले विद्यालयहरू आउँदो आइतबारदेखि पूर्ववत् समय तालिका अनुसार सञ्चालन हुने सूचनामा उल्लेख छ ।
