पेट्रोलियम पदार्थको मूल्यमा वृद्धि

काठमाडौं । नेपाल आयल निगम ले पेट्रोलियम पदार्थको मूल्यमा वृद्धि गरेको छ। निगमले आजदेखि लागू हुने गरी पेट्रोल, डिजेल तथा मट्टीतेलको मूल्य वृद्धि गरेको जनाएको छ।

निगमका अनुसार पेट्रोलमा प्रतिलिटर १ रुपैयाँ तथा डिजेल र मट्टीतेलमा प्रतिलिटर ३ रुपैयाँले मूल्य बढाइएको छ। नयाँ समायोजित मूल्यअनुसार काठमाडौं, पोखरा र दिपायल क्षेत्रमा पेट्रोलको मूल्य प्रतिलिटर १५६ रुपैयाँ कायम गरिएको छ।

त्यसैगरी सुर्खेत र दाङमा पेट्रोल प्रतिलिटर १५५ रुपैयाँ तोकिएको छ भने चारआली, विराटनगर, अमलेखगञ्ज, भलवारी, नेपालगञ्ज, धनगढी र वीरगञ्ज क्षेत्रमा पेट्रोलको मूल्य प्रतिलिटर १५३ रुपैयाँ ५० पैसा निर्धारण गरिएको छ।

मट्टीतेलको मूल्य प्रतिलिटर १४२ रुपैयाँ कायम गरिएको निगमले जनाएको छ।