यस वर्षको एसइई भोलिबाट सुरु, ५ लाख १२ हजार ४२१ विद्यार्थी सहभागी

काठमाडौँ । राष्ट्रिय परीक्षा बोर्डले कक्षा १० को माध्यमिक परीक्षा (एसइई) चैत १९ गतेदेखि २९ गतेसम्म सञ्चालन हुदै छ । परीक्षा देशभरका सबै केन्द्रमा बिहान ८ बजेदेखि एकै समयमा सुरु हुनेछ भने पहिलो दिन अनिवार्य अंग्रेजी विषयको परीक्षा रहको छ ।

यस वर्ष कुल ५ लाख १२ हजार ४२१ जना विद्यार्थी परीक्षामा सहभागी हुनेछन् । तीमध्ये ४ लाख ४१ हजार ५६६ नियमिततर्फ र ७० हजार ८५५ ग्रेड वृद्धितर्फका विद्यार्थी छन् । सहभागी मध्ये छात्राको संख्या छात्र भन्दा बढी रहेको बोर्डले जनाएको छ ।

देशभर १ हजार ९६६ परीक्षा केन्द्र निर्धारण गरिएका छन् भने ११ हजारभन्दा बढी विद्यालयका विद्यार्थी सहभागी हुनेछन् । प्रदेशगत रुपमा बागमती प्रदेशमा सबै भन्दा बढी र कर्णाली प्रदेशमा सबैभन्दा कम परीक्षार्थी रहेका छन् ।

परीक्षाको सम्पूर्ण तयारी भइसकेको बोर्डले जनाएको छ । यसवर्ष परीक्षा केन्द्रभित्र सामूहिक अनुगमनमा रोक लगाइएको छ भने प्रश्नपत्रहरु सबै जिल्लामा सुरक्षित रुपमा पुर्याइसकिएको छ र आवश्यक सुरक्षा व्यवस्था मिलाइएको बताइएको छ ।