काठमाडौं । टिकटकले प्रयोगकर्ताका लागि सुरक्षित डिजिटल वातावरण निर्माण गर्ने आफ्नो निरन्तरको प्रतिबद्धता अनुरुप Q4 २०२५ को कम्युनिटी गाइडलाइन्स इन्फोर्समेन्ट रिपोर्ट सार्वजनिक गरेको छ।
२०२५ अक्टोबरदेखि डिसेम्बरसम्मको तथ्यांक समेटिएको यस प्रतिवेदनमा कम्युनिटी गाइडलाइन्स उल्लङ्घन गर्ने कन्टेन्ट पहिचान गरी हटाउन टिकटकले अपनाएका सक्रिय कदमहरूको विवरण प्रस्तुत गरिएको छ, जसले विश्वभरका प्रयोगकर्तालाई सकारात्मक अनुभव सुनिश्चित गर्न सहयोग पुर्याएको छ।
Q4 २०२५ अवधिमा नेपालमा मात्रै टिकटकले कम्युनिटी गाइडलाइन्स उल्लङ्घनका कारण कुल १९ लाख ३२ हजार ५७५ भिडियो हटाएको बताइएको छ। अक्टोबरदेखि डिसेम्बरसम्म सक्रिय रूपमा कन्टेन्ट हटाउने दर ९९.९ प्रतिशत कायम रह्यो, जसमा ९८.४ प्रतिशत भिडियो २४ घण्टाभित्र हटाइएको थियो।
विश्वव्यापी रूपमा, यस अवधिमा टिकटकले कुल १७ करोड ५३ लाख २ हजार ८५ भिडियो हटाएको छ, जुन यस प्लेटफर्ममा अपलोड गरिएका कुल कन्टेन्टको करिब ०.५ प्रतिशत हो। हटाइएका भिडियोमध्ये १५ करोड २५ लाख ८० हजार ९३३ भिडियो अटोमेटेड डिटेक्सन प्रविधिमार्फत पत्ता लगाई हटाइएको थियो भने ८३ लाख ६० हजार ७८० भिडियो रिभ्युपछि पुनर्स्थापना गरिएको थियो।
सक्रिय हटाउने दर ९९.१ प्रतिशत रहेकोमा ९३.४ प्रतिशत फ्ल्याग गरिएका कन्टेन्ट पोस्ट भएको २४ घण्टाभित्र हटाइएको थियो। प्लेटफर्मको विश्वसनीयता कायम राख्न, यस अवधिमा टिकटकले १४ करोड ७७ लाख १६ हजार ५१८ नक्कली एकाउन्टहरू हटाएको जनाएको छ। साथै, १३ वर्षभन्दा कम उमेरका हुन सक्ने आशंका गरिएका थप २ करोड ३८ लाख ७५ हजार ८७९ खाताहरू पनि हटाइएको थियो।
यस त्रैमासिक अवधिमा, एकपटक पनि नहेरिएको अवस्थामा हटाइने भिडियोको संख्यामा कमी आएको देखिएको छ, जसले एआई-आधारित मोडरेशन प्रणालीमा भएको सुधारलाई संकेत गर्दछ। यसले नियम उल्लङ्घन गर्ने पुराना कन्टेन्ट पनि पहिचान गरी हटाउन सक्षम भएको बताइएको छ।
यसैगरी कमेन्ट हटाउने दरमा पनि उल्लेखनीय कमी आएको छ, किनकि टिकटकले अब केही अनुपयुक्त वा आपत्तिजनक कमेन्टहरूलाई सिधै हटाउनेभन्दा तिनीहरूको पहुँच घटाउने रणनीति अपनाएको जनाएको छ। यसैबीच, नक्कली लाइक र नक्कली फलोअर्स हटाउने कार्यमा वृद्धि भएको छ, जसले प्लेटफर्मको वास्तविकता र विश्वसनीयता कायम राख्ने प्रयासलाई बलियो बनाएको प्रतिवेदनले जनाएको छ।
प्रतिवेदन अनुसार, हटाइएका भिडियोमध्ये २१.२ प्रतिशतमा संवेदनशील वा वयस्क विषयवस्तु समावेश थिए, जुन टिकटकका कन्टेन्ट नीतिसँग मेल खाँदैनन्। थप ९.१ प्रतिशत भिडियोले सुरक्षा र सभ्यतासम्बन्धी मापदण्ड उल्लङ्घन गरेका थिए भने १.२ प्रतिशत भिडियोले गोपनीयता र सुरक्षा निर्देशिका उल्लङ्घन गरेका थिए। यसबाहेक, १.६ प्रतिशत भिडियो भ्रामक सूचनासँग सम्बन्धित थिए र १.८ प्रतिशत भिडियो सम्पादन गरिएको वा एआई-निर्मित सामग्री का रूपमा फ्ल्याग गरिएको थियो।
कम्युनिटी गाइडलाइन्स कार्यान्वयन प्रतिवेदनको नियमित प्रकाशनले कन्टेन्ट तथा खाता सम्बन्धी कारबाहीको परिमाण र प्रकृतिबारे स्पष्ट जानकारी प्रदान गर्दछ, जसले टिकटकको पारदर्शिताप्रतिको प्रतिबद्धता देखाउँछ।Q4 २०२५ प्रतिवेदनबारे थप जानकारी लिन तथा टिकटकका कन्टेन्ट पोलिसी, टुल्स र गाइडलाइन्सबारे बुझ्न टिकटकको अंग्रेजीमा उपलब्ध ट्रान्सपेरेन्सी सेन्टर भ्रमण गर्न सकिने बताइएको छ।
टिकटक छोटो अवधिको मोबाइल भिडियोका लागि अग्रणी प्लेटफर्म रहनुका साथै यसको उद्देश्य सिर्जनशीलतालाई प्रेरित गर्नु र प्रयोगकर्तालाई मनोरञ्जन प्रदान गर्नु रहेको जनाइएको छ। टिकटकको विश्वव्यापी मुख्यालय लस एन्जलस र सिङ्गापुरमा रहेको छ भने यसका कार्यालयहरू न्यूयोर्क, लन्डन, डब्लिन, पेरिस, बर्लिन, दुबई, जकार्ता, सियोल र टोकियोमा रहेका छन्।
