प्रतिकूल मौसमका कारण हवाई उडान प्रभावित

काठमाडौं । पश्चिमी वायु र स्थानीय वायुको आंशिक प्रभावका कारण देशका विभिन्न क्षेत्रमा बदली हुँदा हवाई उडान प्रभावित भएका छन्। विशेषगरी काठमाडौं उपत्यकामा बिहानैदेखि आकाश धुम्मिएको र मौसम अँध्यारो देखिएको छ।

प्रतिकूल मौसमका कारण अन्तर्राष्ट्रिय र आन्तरिक उडानमा समेत असर परेको छ। टर्किस एयरलाइन्सको इस्तानबुलबाट आएको विमान त्रिभुवन अन्तर्राष्ट्रिय विमानस्थलमा अवतरण गर्न नसकी दिल्लीतर्फ डाइभर्ट गरिएको विमानस्थल कार्यालयले जनाएको छ।

यस्तै, केही आन्तरिक उडानहरू पनि ढिला (डिले) भएका छन्। मौसममा सुधार नआएसम्म उडान तालिका प्रभावित हुने सम्भावना रहेको छ।

जल तथा मौसम पूर्वानुमान महाशाखाका अनुसार हाल कोशी प्रदेश, मधेश प्रदेश, बागमती प्रदेश, गण्डकी प्रदेश र लुम्बिनी प्रदेशका हिमाली तथा पहाडी क्षेत्रमा साधारणदेखि मध्यम बदली रहेको छ। यस्तै, कोशी, गण्डकी र लुम्बिनी प्रदेशका केही स्थानमा तथा बागमती प्रदेशका एक–दुई स्थानमा मध्यम वर्षा तथा हिमपात भइरहेको छ। सुदूरपश्चिम प्रदेशका तराई क्षेत्रमा भने मौसम सामान्यतया सफा रहेको छ।