वैशाख २९ भित्रै एसइई नतिजा सार्वजनिक हुने, बोर्डको अन्तिम तयारी पुरा

काठमाडौं । राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसइई) को नतिजा वैशाख २९ गतेभित्र सार्वजनिक गर्ने गरी अन्तिम तयारी पुरा गरेको जनाएको छ । सरकारले परीक्षा सम्पन्न भएको एक महिनाभित्रै नतिजा प्रकाशन गर्ने लक्ष्य तय गरेसँगै बोर्डले तीव्र रुपमा काम अघि बढाएको हो ।

यसअघि एसइई नतिजा प्रकाशनमा करिब तीन महिना लाग्ने गरे पनि यस वर्ष पहिलोपटक छोटो अवधिमै नतिजा सार्वजनिक गर्न लागिएको र्बोडले जनाएको छ ।

र्बोडका अनुसार निर्धारित समयमै नतिजा प्रकाशन सुनिश्चित गर्न आवश्यक जनशक्ति परिचालन गरिएको छ । प्राविधिक प्रक्रिया समयमै सम्पन्न भए नतिजा तोकिएको मितिभन्दा केही दिनअघि नै सार्वजनिक हुन सक्ने सम्भावना पनि रहेको अधिकारीहरुले बताएका छन् ।

चैत १५ गतेदेखि सुरु भएर २९ गते सम्पन्न भएको यस वर्षको एसइईको नतिजा छिटो सार्वजनिक गर्न बोर्डले अपनाएको विकेन्द्रीकृत प्रणाली प्रभावकारी भएको बताइएको छ ।

सम्पूर्ण प्रक्रिया पुरा भएपछि बोर्ड बैठकमार्फत नतिजा सार्वजनिक गर्ने औपचारिक निर्णय गरिनेछ । विगतका वर्षहरुमा भने एसइई नतिजा जेठ अन्तिम वा असार पहिलो सातातिर मात्र सार्वजनिक हुने गरेको थियो ।