एनएमबि बैंकले सुरु गर्‍यो नेपाल–भारत क्रस–बोर्डर पीटुपी रेमिट्यान्स सेवा

काठमाडौं ।   एनएमबि बैंक लिमिटेडले नेपाल र भारतबीच सहज, सुरक्षित तथा तत्काल रकम आदानप्रदान गर्न सकिने ‘इन्डो–नेपाल पर्सन–टु–पर्सन (पीटुपी) रेमिट्यान्स सेवा’ सञ्चालनमा ल्याएको छ।

नेपाल क्लियरिङ हाउस लिमिटेड (NCHL) सँगको सहकार्यमा सुरु गरिएको उक्त सेवामार्फत ग्राहकहरूले नेपालबाट भारत तथा भारतबाट नेपालमा छिटो, सुरक्षित र झन्झटरहित रूपमा रकम पठाउन तथा प्राप्त गर्न सक्ने बैंकले जनाएको छ।

बैंकका अनुसार नयाँ सेवाले परम्परागत सीमापार रेमिट्यान्स प्रक्रियामा हुने ढिलाइ तथा जटिलतालाई हटाउँदै डिजिटल माध्यमबाट तत्काल रकम स्थानान्तरणको सुविधा उपलब्ध गराउनेछ। भारतबाट पठाइएको रकम एनएमबि बैंकमा रहेको लाभग्राहीको खातामा तुरुन्तै जम्मा हुने व्यवस्था गरिएको छ।

सेवाअन्तर्गत ग्राहकहरूले मोबाइल बैंकिङ एप तथा बैंकको आधिकारिक वेबसाइटमार्फत सहज रूपमा रकम पठाउन र प्राप्त गर्न सक्नेछन्। साथै, बैंकका शाखा कार्यालयमार्फत पनि यो सेवा सक्रिय गर्न सकिने व्यवस्था गरिएको छ ग्राहकलाई बैंक खाता नम्बर साझा गर्नुपर्ने झन्झटबाट मुक्त गराउन बैंकले भर्चुअल पेमेन्ट एड्रेस (Virtual Payment Address)  को सुविधा समेत उपलब्ध गराएको छ। यसमार्फत ग्राहकहरूले सुरक्षित र सहज रूपमा सीमापार रकम कारोबार गर्न सक्नेछन्।

एनएमबि बैंकका अनुसार यो सेवा नेपाल र भारतबीचको डिजिटल वित्तीय पहुँच विस्तार गर्ने तथा ग्राहकलाई आधुनिक बैंकिङ अनुभव प्रदान गर्ने उद्देश्यले सञ्चालनमा ल्याइएको हो। बैंकले सेवाको सुरक्षा सुनिश्चित गर्न अत्याधुनिक प्रविधि तथा निगरानी प्रणाली प्रयोग गरिएको जनाएको छ।

हाल एनएमबि बैंकले देशभर १९८ शाखा, १७६ एटीएम तथा ९ एक्सटेन्सन काउन्टरमार्फत बैंकिङ सेवा प्रदान गर्दै आएको छ। बैंकले नवीन डिजिटल सेवामार्फत ग्राहकको सुविधा अभिवृद्धि गर्दै वित्तीय समावेशीकरणलाई थप सुदृढ बनाउने लक्ष्य लिएको जनाएको छ।