काठमाडौं । नेपालमा जिली र बिएडब्लु विद्युतीय सवारीसाधनको आधिकारिक आयातकर्ता तथा वितरक एलआरआर मोटर्सले फिफा विश्वकप २०२६ को उत्साहलाई लक्षित गर्दै ‘जिली महा फुटबल फेस्ट तथा सुपर एक्सचेन्ज क्याम्प’ सुरु गरेको छ। गैरीधारास्थित जिली शोरुममा शुक्रबारदेखि सुरु भएको यो प्रवर्द्धनात्मक अभियान असार ९ गते (जुन २३) सम्म सञ्चालन हुने कम्पनीले जनाएको छ। अभियानअन्तर्गत ग्राहकहरूले सवारी खरिदसँगै पेनाल्टी सुटआउटमा सहभागी भई नगद छुट प्राप्त गर्ने अवसर पाउनेछन्।
कम्पनीका अनुसार जिली ईएक्स–५ खरिद गर्ने ग्राहकले पेनाल्टी सुटआउटमा गरेको प्रत्येक सफल गोलबापत एक लाख रुपैयाँ तत्काल नगद छुट प्राप्त गर्नेछन्। त्यसैगरी, बिएडब्लु ई–सेभेन प्रो खरिद गर्ने ग्राहकले प्रत्येक गोलबापत २५ हजार रुपैयाँ नगद छुट प्राप्त गर्न सक्नेछन्। ग्राहकलाई सवारी खरिद प्रक्रियालाई थप सहभागितामूलक, मनोरञ्जनात्मक र स्मरणीय बनाउने उद्देश्यले शोरुम परिसरमा विशेष फुटबल मैदान तयार गरिएको छ। खेलमा जिली तथा बिएडब्लुका बिक्री प्रतिनिधिमध्ये एक जनाले गोलरक्षकको भूमिका निर्वाह गर्नेछन् भने ग्राहकले गरेका सफल गोलको सङ्ख्याअनुसार छुट निर्धारण हुनेछ।
नगद छुटका अतिरिक्त अभियान अवधिभर सवारी खरिद गर्ने ग्राहकले एक वर्षको अटो प्लस बीमा, एक वर्षको वार्षिक सवारी कर तथा निःशुल्क २–इन– १ एडाप्टेबल चार्जर प्राप्त गर्ने कम्पनीले जनाएको छ। साथै, भेहिकल–टु–लोड (भी–टु–एल) कफी अनुभव, प्रत्येक टेस्ट ड्राइभमा उपहार ह्याम्पर तथा सहज पार्किङ सुविधाको पनि व्यवस्था गरिएको छ। यसका साथै, सुपर एक्सचेन्ज क्याम्पअन्तर्गत ग्राहकले आकर्षक एक्सचेन्ज सुविधा, सवारी मूल्याङ्कन सेवा तथा अन्य विशेष अफरहरूको समेत लाभ लिन सक्ने कम्पनीले जनाएको छ।
एलआरआर मोटर्सका सेल्स हेड अधिर श्रेष्ठले फुटबलले सिर्जना गर्ने उत्साह, प्रतिस्पर्धा र उपलब्धिको भावनालाई सवारी खरिद अनुभवसँग जोड्ने उद्देश्यले अभियान सञ्चालन गरिएको बताए। उनका अनुसार यस अभियानले ग्राहकलाई मनोरञ्जनसँगै आफ्नै क्षमता परीक्षण गर्ने र उल्लेखनीय बचत गर्ने अवसर प्रदान गर्नेछ। उनले जिली ईएक्स–५ वा बिएडब्लु ई–सेभेन प्रोमध्ये जुनसुकै सवारी रोजे पनि प्रत्येक सफल गोलले ग्राहकका लागि थप बचत सुनिश्चित गर्ने विश्वास व्यक्त गरे।
कम्पनीका अनुसार जिली ईएक्स–५ उन्नत प्रविधि, प्रिमियम आराम, बुद्धिमान सुरक्षा प्रणाली तथा उत्कृष्ट ड्राइभिङ रेन्जका कारण नेपालको विद्युतीय एसयूभी बजारमा लोकप्रिय बन्दै गएको छ। त्यसैगरी, नेपाली बजारमा छिट्टै सार्वजनिक हुने बिएडब्लु ई–सेभेन प्रो व्यवहारिक, किफायती तथा वातावरणमैत्री विद्युतीय सवारीका रूपमा ग्राहकको रोजाइ बन्ने अपेक्षा गरिएको छ। एलआरआर मोटर्सले सम्पूर्ण ग्राहक, फुटबलप्रेमी तथा विद्युतीय सवारी खरिदमा रुचि राख्ने व्यक्तिलाई गैरीधारास्थित जिली शोरुममा उपस्थित भई टेस्ट ड्राइभ, पेनाल्टी सुटआउट तथा सुपर एक्सचेन्ज क्याम्पको लाभ लिन आग्रह गरेको छ।
