युनाइटेड सिमेन्टद्वारा धुनीबेँसीमा निःशुल्क स्वास्थ्य शिविर सम्पन्न, १४३ जना लाभान्वित

काठमाडौं । युनाईटेड सिमेन्ट्सले आफ्नो सामाजिक उत्तरदायित्व कार्यक्रमअन्तर्गत धुनीवेशी नगरपालिका–९ का स्थानीय बासिन्दाका लागि निःशुल्क बृहत् स्वास्थ्य शिविर सञ्चालन गरेको छ ।

ललितपुरस्थित मेघा अस्पतालका सात जना स्वास्थ्यकर्मीको सहभागितामा सञ्चालन गरिएको शिविरमा जनरल फिजिसियन डा. जमाल अश्रफ, बालरोग विशेषज्ञ डा. दीपा खनाल तथा दन्तरोग विशेषज्ञ डा. सङ्गीता कुमारीले विशेषज्ञ स्वास्थ्य सेवा प्रदान गरेका थिए । अस्पतालकी संयोजक शिल्पा पोखरेलले स्वास्थ्य टोलीको नेतृत्व गरेकी थिन् ।

शिविरबाट १४३ जनाले स्वास्थ्य परीक्षण तथा परामर्श सेवा लिएका कम्पनीले जनाएको छ । सेवाग्राहीमध्ये ७ वर्षदेखि ८५ वर्षसम्मका बालबालिका र ज्येष्ठ नागरिक रहेका थिए । अधिकांश सेवाग्राही धुनीबेँसी नगरपालिका–९ का स्थानीय बासिन्दा थिए भने पुरुषको तुलनामा महिलाको सहभागिता बढी रहेको जनाइएको छ । स्वास्थ्य परीक्षणसँगै आवश्यक औषधि पनि निःशुल्क वितरण गरिएको थियो ।

कार्यक्रममा स्थानीय जनप्रतिनिधि, समाजसेवी तथा विभिन्न क्षेत्रका व्यक्तित्वहरूको सहभागिता रहेको थियो । शिविरमा सहभागीलाई फलफूलको जुस र बिस्कुटसमेत वितरण गरिएको थियो । कार्यक्रमको समन्वय युनाइटेड सिमेन्टका प्रशासन प्रमुख धनपति सापकोटाले गरेका थिए भने कम्पनीका महाप्रबन्धक हरिकुमार उप्रेती प्रमुख अतिथिका रूपमा सहभागी भएका थिए ।

स्वास्थ्य परीक्षणका क्रममा अधिकांश सेवाग्राहीमा ढाड, कम्मर तथा घुँडासम्बन्धी समस्या देखिएको चिकित्सकहरूले बताएका छन् । स्थानीयवासीले नियमित स्वास्थ्य परीक्षण गराउने बानी कम रहेको पनि चिकित्सकहरूको निष्कर्ष छ । शिविरमा सहभागी स्थानीयले यस्ता स्वास्थ्य सेवा कार्यक्रम समय–समयमा सञ्चालन गर्नुपर्ने आवश्यकता औँल्याएका थिए ।

कार्यक्रमको समापनमा स्थानीय बासिन्दाले समुदायको स्वास्थ्यप्रति चासो देखाउँदै निःशुल्क स्वास्थ्य शिविर आयोजना गरेकोमा युनाइटेड सिमेन्टप्रति आभार व्यक्त गरेका थिए । कम्पनीका महाप्रबन्धक उप्रेतीले कार्यक्रम सफल बनाउन सहयोग गर्ने स्थानीय सरकार, विद्यालयका प्रतिनिधि तथा अन्य सहयोगीप्रति धन्यवाद व्यक्त गरेका थिए ।