एलजी सीप शिक्षाबाट नेपाली युवामा रोजगारीको आशा, ४०० मध्ये ३० प्रतिशतले पाए रोजगार

काठमाडौं । युवाहरूलाई प्राविधिक सीपमार्फत रोजगारी र उद्यमशीलतासँग जोड्ने लक्ष्यसहित सञ्चालन गरिएको ‘एलजी सीप शिक्षा’ कार्यक्रमले नेपाली युवाको भविष्य बदल्ने अभियानलाई गति दिएको छ। एलजी र चौधरी ग्रुप (सीजी) को सहकार्यमा सञ्चालित कार्यक्रममार्फत हालसम्म करिब ४०० युवाले प्राविधिक तालिम प्राप्त गरेका छन्, जसमध्ये करिब ३० प्रतिशतले रोजगारीको अवसर पाइसकेको आयोजकले जनाएको छ।

एयर कन्डिसनर, रेफ्रिजरेटर तथा विद्युतीय उपकरणको जडान र मर्मतसम्बन्धी व्यावहारिक तालिमले युवालाई स्वदेशमै रोजगारी र स्वरोजगारतर्फ आकर्षित गरिरहेको बताइएको छ।

सोमबार काठमाडौंमा आयोजित कार्यक्रममा एलजी सिंगापुरका प्रबन्ध निर्देशक जोनाथन चान्थाले आधुनिक प्रविधि र कृत्रिम बुद्धिमत्तासँगै सीप विकासलाई सामाजिक उत्तरदायित्वको महत्वपूर्ण पक्षका रूपमा अघि बढाइएको बताए।

चौधरी ग्रुपका प्रबन्ध निर्देशक निर्वाण चौधरीले ठूलो ब्रान्डसँग ठूलो सामाजिक जिम्मेवारी पनि जोडिने उल्लेख गर्दै प्राविधिक सीप नै भविष्यको रोजगारीको आधार भएको धारणा राखे। उनले चौधरी फाउन्डेसनअन्तर्गत सञ्चालित ‘नबिल स्कुल अफ सोसल इन्टरप्रेनरशिप’ मार्फत तीन वर्षमा १,२०० युवा स्नातक भएको, १,१०० भन्दा बढी रोजगारी सिर्जना भएको र ४६ नयाँ व्यवसाय स्थापना भएको जानकारी दिए।

कार्यक्रममा काठमाडौं मोडल कलेजका शिक्षक सुरेन्द्र बजगाईले शैक्षिक संस्था, निजी क्षेत्र र स्थानीय सरकारबीचको सहकार्यले युवालाई सीपयुक्त र आत्मनिर्भर बनाउने अभियानलाई प्रभावकारी बनाएको बताए।

वक्ताहरूले सीप विकासलाई केवल तालिममा सीमित नराखी आत्मविश्वास, निरन्तर सिकाइ र उद्यमशीलताको आधारका रूपमा विकास गर्नुपर्नेमा जोड दिए। आयोजकका अनुसार ‘एलजी सीप शिक्षा’ कार्यक्रमको लक्ष्य सक्षम, आत्मनिर्भर र रोजगारमुखी जनशक्ति उत्पादन गर्दै नेपालको आर्थिक तथा सामाजिक विकासमा योगदान पुर्याउनु हो।

भिडियो – https://www.facebook.com/share/v/19MAD6QKeR/