पृथ्वीमा खस्दै छ नियन्त्रण गुमाएको रुसी यान

एजेन्सी : रूसको अन्तरिक्ष यान एम-२७ एम शुक्रबार पृथ्वीमा खस्दैछ । अघिल्लो साता लन्च गरेपछि नियन्त्रण बाहिर गएको यो यान शुक्रबार पृथ्वीमा खसेर नष्ट हुने वैज्ञानिकहरुले जानकारी दिएका छन् ।

यो मानवरहित कार्गोसिप अघिल्लो मंगलबार काजाखस्तानबाट लन्च गरिएको थियो । लन्च गरिएको केही समयमै यो यानसँग नियन्त्रणकक्षको सम्पर्क विच्छेद हुन पुगेको थियो ।

अन्तरिक्ष यान एम-२५ एम पृथ्वीको बायुमण्डलमा प्रवेश गर्ने वित्तिकै यो यान टुक्रा टुक्रा हुनेछ । यो यानमा तीन टनबढी अतिआवश्यक सामान र उपकरण रहेका छन् ।

वैज्ञानिकहरुका अनुसार यो यानका टुक्रा जमिनमा नभर्इ समुद्रमा खस्ने छन् । यो यानले पृथ्वी भन्दा करिब ४ सय २० किलोमिटर टाढा अन्तर्राष्ट्रिय अन्तरिक्ष स्टेशनमा रहेका ६ जना वैज्ञानिकलार्इ खाद्य सामग्री, इन्धन, अक्सिजन र कपडा बोकेको थियो ।

तर लन्च गरिएको केही समयमै यो यानले नियन्त्रण कक्ष भन्दा सम्पर्क बाहिर गएपछि पृथ्वीमा विपत् आउने अनुमान गरिएको थियो ।

रूसी अन्तरिक्ष एजेन्सी रोसकोसमोसका अनुसार यो यान नेपाली समयअनुसार शुक्रबार बिहान धर्तीमा खस्ने छ । ‘रूसी यानका केबल साना र केही टुक्रामात्र धर्तिमा आइपुग्नेछन्’, उसले भनेको छ ।

अन्नपुर्ण पोष्ट बाट