श्वेतगंगा हाइड्रोपावर एण्ड कन्स्ट्रक्सनको आईपीओ बाँडफाट

काठमाडौं । श्वेतगंगा हाइड्रोपावर एण्ड कन्स्ट्रक्सन लिमिटेडको आईपीओ बाँडफाट भएको छ ।

बुधबार बिहान धितोपत्र सेयर निष्काशन तथा बिक्री प्रबन्धक सानिमा क्यापिटलको कम्पनीको आईपीओ बाँडफाँड गरेको हो । कम्पनीले साउन ४ गतेदेखि प्रतिसेयर १०० रुपैयाँ अंकित मूल्यमा जारी पूँजी १ अर्ब ५९ करोड ३० लाख रुपैयाँको १५ प्रतिशतले हुन आउने २३ करोड ८९ लाख ५० हजार रुपैयाँ बराबरको २३ लाख ८९ हजार ५०० कित्ता साधारण सेयर निष्कासन गरेको थियो । ५ प्रतिशत सामूहिक लगानी कोषलाई बाँडफाँट गरेर २२ लाख ७० हजार २५ कित्ता सेयर सर्वसाधारणका लागि निष्कासन गरिएको थियो ।

बिक्री प्रबन्धक सानिमा क्यापीटलले कम्पनीको आईपीओमा कुल १५ लाख ४३ हजार ९ सय ४५ जना आवेदकबाट १ करोड ७० लाख ७२ हजार ८ सय ७० कित्ताको लागि आवेदन परेको जनाएको छ । जसमध्ये ४ हजार ४ सय ४० जनाको आवेदन रद्द हुँदा १५ लाख ३९ हजार ५ सय ५ जना आवेदकको आवेदन सदर भएको थियो । कम्पनीको आईपीओमा मागभन्दा बढी आवेदन परेकोले गोलप्रथाबाट सेयर बाँडफाँट भएको छ ।

कम्पनीको साधारण सेयर २ लाख २७ हजार २ सयले १० कित्ताका दरले पाएका छन् । जसमध्ये ५ जनाले थप १ कित्ताको दरले ११ कित्ता पाए । कम्पनीलाई केयर रेटिङ नेपालले ‘केयर एनपी डबल बी आइएस’ रेटिङ दिएको छ । यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्छ ।

कम्पनीले २८.१ मेगावाट क्षमताको तल्लो लिखु जलविद्युत् आयोजना निर्माण गरिरहेको छ । आयोजनाको कुल अनुमानित लागत ६ अर्ब ३७ करोड २० लाख रहेको जनाइएको छ ।