कुमारी बैंकको नाफा ४४ प्रतिशतले वृद्धि

काठमाडौं । कुमारी बैंकको नाफा गत आर्थिक वर्ष २०७८/७९ मा करिब ३ अर्ब पुगेको छ ।

प्रकाशन गरेको गत आ.व.को अपरिस्कृत वित्तीय विवरण अनुसार बैंकले २ अर्ब ८३ करोड ५२ लाख रुपैयाँ नाफा कमाएको छ । अघिल्लो आर्थिक वर्ष २०७७/७८ मा १ अर्ब ९७ करोड ७ लाख नाफा कमाएको बैंकको नाफा गत आ.व.मा ४३.८७ प्रतिशतले नाफा वृद्धि भएको हो । खुद ब्याज आम्दनी र बैंकको नाफा पनि उल्लेख्य बढेको ट ।

गत आ.व.मा खुद ब्याज आम्दानी २५.६७ प्रतिशतले बढाएर ६ अर्ब ३८ करोड ७ लाख खुद ब्याज आर्जन गरेको छ । अघिल्लो आ.व.मा बैंकले खुद ब्याज ५ अर्ब ७ करोड ७५ लाख आर्जन गरेको थियो । गत आ.व.मा बैंकको निक्षेपमा २१.२१ प्रतिशतले बढेर १ खर्ब ७६ अर्ब ७६ करोड ७७ लाख पुग्दा कर्जा ११.२२ प्रतिशतले बढेर १ खर्ब ५३ अर्ब ३६ करोड ९८ लाख पुगेको छ । कर्जा ११ प्रतिशतले मात्रै बढ्दा पनि कर्जा र निक्षेपबीचको ब्याजदर अन्तर (स्प्रेड दर) बढाउँदा बैंकको खुद ब्याज आम्दानी बढेको हो ।

यसैगरी, अघिल्लो आ.व २०७७/७८ मा ३.३१ प्रतिशत रहेको बैंकको स्प्रेड रेट बढेर आ.व. २०७८/७९ मा ४.३६ प्रतिशत पुगेको छ । जसले बैंकको खुद ब्याज आम्दानी बढेको छ । त्यस्तै, आम्दानी बढेसँगै कर्मचारी खर्च बढेको भए तापनि नाफा बढेको छ । बैकको कर्मचारी खर्च २ अर्ब २ करोड ३९ लाखबाट बढेर २ अर्ब ३४ करोड १५ लाख पुगेको छ । बैंकको सञ्चालन मुनाफा ३२.६८ प्रतिशतले बढेर ३ अर्ब ९८ करोड ८२ लाख पुगेको छ । अघिल्लो आर्थिक वर्ष ०७७/७८ मा बैंकले ३ अर्ब ५८ लाख सञ्चालन मुनाफा कमाएको थियो ।

बैंकको प्रतिसेयर आम्दानी र नेटवर्थ पनि बढेको छ । अघिल्लो आ.व.मा १४ रुपैयाँ २० पैसा रहेको बैंकको प्रतिसेयर आम्दानी गत आ.व.मा १९.२७ रुपैयाँ पुगेको छ । यस्तै बैंकको प्रतिसेयर नेटवर्थ १३६.१३ रुपैयाँबाट बढेर १४४.१ रुपैयाँ पुगेको छ । अघिल्लो आ.व.मा १३ अर्ब ८७ करोड ८५ लाख चुक्ता पूँजी बैंकले गत आ.व.मा बोनस सेयरमार्फत चुक्ता पूँजी १४ अर्ब ७१ करोड १२ लाख पुर्‍याएको छ ।

बैंकको निष्क्रिय कर्जा ०.९६ प्रतिशत रहँदा पूँजी पर्याप्तता अनुपात १३.७१ प्रतिशतबाट झरेर १२.९८ प्रतिशत पुगेको छ । तयस्तै, कर्जा-निक्षेप अनुपात ८५.१२ प्रतिशत रहेको बैंकले गत आ.व.मा सेयरधनीलाई वितरण गर्न मिल्ने नाफा भने १ अर्ब ७७ करोड ३९ लाख रुपैयाँ छ ।