गृहमन्त्रीको निर्णय : अगुवा-पछुवा सुरक्षाकर्मी राख्दिन, साइरन बजाएर हिँड्दिन

काठमाडौं । गृहमन्त्री रवि लामिछानेले नागरिकको सुरक्षाका निम्ति आफूले बोलेको वचन इमानदारिताका साथ पुरा गर्ने बताएका छन् । उनले शुक्रबार सामाजिक सञ्जाल मार्फत गृहमन्त्रीको सवारीका क्रममा रहने अगुवा-पछुवा सुरक्षाकर्मी सहितको गाडी हटाएर अगाडी एउटा मात्र गाडी सुरक्षामा राख्ने निर्णय गरेको समेत जनाएका छन् ।

उनी लेख्छन्,
नागरिकलाई सुरक्षित महसुस हुने वातावरण निर्माण गर्ने निकाय हो गृह प्रशासन। म यसको नेतृत्वमा रहँदा, म मात्र उच्च सुरक्षा घेरामा हिँडडुल गरेर नागरिकको अपेक्षा पुरा हुँदैन । म मेरो भन्दा पनि नागरिकको सेवा र सहजताका लागि काम गर्न यो जिम्मेवारीमा आएको हुँ । म आफूले बोलेका कुरा इमानदारिताका साथ पुरा गर्नेछु ।

-उपप्रधानमन्त्री एवं गृहमन्त्रीको नियुक्ति लगत्तै मैले मेरो सुरक्षामा खटिने प्रहरी निरीक्षकको नेतृत्वलाई घटाएर प्रहरी नायब निरीक्षक ९सई०को नेतृत्व सुरक्षाकर्मी राखेको छु ।

-उपप्रधानमन्त्री तथा गृहमन्त्रीको सवारीका क्रममा रहने अगुवा-पछुवा सुरक्षाकर्मी सहितको गाडी हटाएर मैले आजैबाट अगाडी एउटा मात्र गाडी सुरक्षामा राख्ने निर्णय गरेको छु । भई परि आउँदाको परिस्थितिलाई अपवाद मानिदिनु होला।

-सडक नियमको पूर्ण पालना सबैले गर्नुपर्छ भनेर नियम लागु गराउने निकायको नेतृत्व गर्ने म सधैँ ट्राफिक बत्तीमा लाइन बसेर नै यात्रा गर्छु र सडक लेन अनुशासन पूर्ण पालना गर्ने गराउने कुरामा प्रतिबद्ध छु। कुनै अकाट्य परिस्थिति आइ पर्दा बाहेक म आफ्नो कार्यकाल भरी नै यी नियम पालना गर्छु।

-साईरन बजाएर नागरिकलाई उछिन्दै हिँड्ने प्रवृत्तिको म सधैँ आलोचक हुँ,आकस्मिक अवस्थामा बाहेक मबाट यस्तो गतिविधि हुँदैन।

-व्यक्तिगत कामकालागि कतै जानु परेमा वा विदाका दिनमा म आफ्नै सवारीसाधन प्रयोग गर्छु र यदि कुनै अवस्थामा सरकारी सवारीसाधन प्रयोग गर्नु परेमा त्यसको हिसाब राज्यलाई बुझाउने छु।