महासंघको वरिष्ठ उपाध्यक्ष पदका लागि पुनः निर्वाचन हुने

काठमाडौँ । महासंघको निर्वाचन हिंजो सम्पन्न भएको थियो । तर नेपाल उद्योग वाणिज्य महासंघको वरिष्ठ उपाध्यक्ष पदमा फेरि निर्वाचन हुने भएको छ । तीन प्रतिस्पर्धीमध्ये कसैले पनि ५० प्रतिशत मत कटाउन नसकेपछि पहिलो र दोस्रो हुनेका बीचमा पुनः निर्वाचन हुन लागेको हो। तीन उम्मेदवार मध्य प्रत्यासी रामचन्द्र संघाई प्रतिस्पर्धाबाट बाहिरिएका छन् ।

मतको आधारमा पहिलो भएका अञ्जन श्रेष्ठ र दोस्रो भएका उमेशलाल श्रेष्ठबीच पुनः प्रतिस्पर्धा हुने भएको छ । बुधबार भएको निर्वाचनको परिणाम सार्वजनिक हुँदा कसैले पनि ५० प्रतिशत मतभार कटाउन नसकेपछि सबैभन्दा धेरै मत पाएका अञ्जन र उमेशबीच दोस्रो चरणको निर्वाचन हुन लागेको हो ।

हिजोको मतदानबाट अञ्जनले ३७.९९ प्रतिशत मत ल्याए भने उनका निकटतम प्रतिस्पर्धी उमेशलालले ३१.७१ प्रतिशत मत पाए । ३०.४६ प्रतिशत मत पाएका संघाई दोस्रो चरणको प्रतिस्पर्धाबाट बाहिरिएका छन्। महासंघको विधानअनुसार वरिष्ठ उपाध्यक्षमा चुनिएको उम्मेदवार तीन वर्षे कार्यकालपछि स्वतः अध्यक्ष हुने व्यवस्था छ ।