काठमाडौं । नेपालले आज शुक्रबार एसिसी प्रिमियर कप अन्तर्गत आफ्नो दोस्रो खेलमा ओमानसँग प्रतिस्पर्धा गर्दै छ । समूह ‘ए’ मा रहेको नेपालले पहिलो खेलमा मलेसियालाई पराजित गरेको थियो । ओमानविरुद्ध मैदान उत्रिएसँगै नेपालले आफ्नो ५० औँ एकदिवसीय अन्तर्राष्ट्रिय खेल पूरा गर्ने छ । खेल बिहान ९ बजे टियु मैदानमा सुरु हुने छ ।
नेपालले सन् २०१८ को मार्च १५ मा ओडिआई मान्यता प्राप्त गरेको थियो । त्यसपछि ०१८ को अगष्ट १ मा नेदरल्यान्ड्ससँग प्रतिस्पर्धा गर्दै एकदिवसीय अन्तर्राष्ट्रियमा डेब्यू गरेको थियो । त्यसयता नेपालले ४९ खेल पूरा गरेको छ । ४९ ओडिआईमा नेपालको २६ मा जित, २१ मा हार, एक मा बराबरी र एक खेल नतिजाबिहीन खेलेको छ ।
नेपालले युएईसँग १३, पपुवा न्युगिनीसँग १०, ओमान, नामिबिया, स्कटल्यान्ड र अमेरिकासँग समान ६ ओडिआई खेल खेलेको छ । नेदरल्यान्ड्ससँग दुई ओडिआई खेल खेलेको छ । नेपालले हालसम्म कुल ७ देशसँग ओडिआई खेल खेलेको छ । नेपालले आफ्ना अधिकांस खेल आइसिसी विश्वकप लिग–२ मा खेलेको छ ।
जहाँ ३६ खेल खेलेको नेपालले विश्वकप छनोटमा शीर्ष तीनमा रहेर स्थान बनाइसकेको छ । ४९ ओडिआई खेल्दा नेपालबाट ४ खेलाडीले कप्तानको भूमिका निभाइसकेका छन् । जसमा पारस खड्काले ६, ज्ञानेन्द्र मल्लले १०, सन्दीप लामिछानेले १४ र रोहित पौडेलले १९ ओडिआई खेलमा कप्तानी गरेका छन् ।
घरेलु मैदानमा जारी सिरिजमा नेपाल समूह चरणमा ओमान, कतार, मलेसिया र साउदीसँग प्रतिस्पर्धा गर्ने छ । नेपालको समूहमा ओमान र नेपाल सेमिफाइनलका मुख्य दाबेदार हुन् । समूह बीमा युएई, हङकङ, कुवेत, सिंगापुर र बहराइन छन् ।
प्रतियोगिताको उपाधि जित्ने टिमले एसिया कप खेल्ने छ । एसिया कपमा समूह ए मा भारत, पाकिस्तान र प्रिमियर कप विजेता टोली हुने छन् । समूह बी मा बंगलादेश, अफगानिस्तान र श्रीलंका छन् । नेपालले पहिलो खेलमा मलेसियालाई ६ विकेटले हराएको थियो ।
सन्दीपलाई कीर्तिमानको अवसर
नेपाली राष्ट्रिय टिमका लेग स्पिनर सन्दीप लामिछानेले एसिसी प्रिमियर कपमा आजको खेलमा ओमानविरुद्ध एक विकेट लिएमा ओडिआई क्रिकेट इतिहासमा दुर्लभ कीर्तिमान बनाउने छन् । उनले एक विकेट लिएमा ओडिआई इतिहासकै सर्वाधिक छिटो एक सय विकेट लिने खेलाडीको विश्व कीर्तिमान आफ्नो नाममा बनाउने छन् । सन्दीपले ४१ खेलमा ९९ विकेट लिएका छन् ।
सन्दीपले आज एक विकेट लिएमा ४२ खेलमा एक सय विकेट ओडिआईमा पूरा गर्ने छन् । जुन ओडिआई क्रिकेट इतिहासकै सर्वाधिक छिटो एक सय विकेट पूरा गर्ने कीर्तिमान हुने छ । ओडिआईमा सर्वाधिक छिटो एक सय विकेट पूरा गर्ने कीर्तिमान अफगानिस्तानका राशिद खानको नाममा छ । राशिद खानले ४४ खेलमा १ सय विकेट पूरा गरेका थिए ।
सन्दीप ओडआईमा ५० विकेट सर्वाधिक छिटो पूरा गर्ने विश्वकै दोस्रो खेलाडी हुन् । सन्दीपले २२ खेलमा ओडिआईमा ५० विकेट पूरा गरेका थिए । १९ औँ खेलमा श्रीलंकाका अजन्था मेन्डिसले ५० विकेट लिँदै सर्वाधिक छिटोको कीर्तिमान कायम गरेका थिए । सन् २०१८ मा नेदरल्यान्ड्सविरुद्ध ओडिआईमा डेब्यू गरेका सन्दीपले तीन पटक पाँचमाथि विकेट लिएका छन् ।
सन्दीप ओडिआईमा नेपालबाट एक सय विकेट पूरा गर्ने पहिलो खेलाडीसमेत बन्ने छन् । सन्दीपपछि नेपालबाट ओडिआईमा सर्वाधिक विकेट सोमपाल कामीले लिएका छन् । सोमपाल कामीले ४४ खेलमा ६१ विकेट लिएका छन् । त्यस्तै, करण केसीले ३८ खेलमा ५६ विकेट लिएका छन् ।
