उपनिर्वाचनको मौन अवधिमा आचारसंहिता उल्लङ्घन नगर्न प्रेस काउन्सिलको अपिल

काठमाडौं । प्रेस काउन्सिल नेपालले वैशाख १० गते हुन लागेको उपनिर्वाचनमा आचारसंहिताको उल्लङ्घन नगर्न सञ्चार माध्यमलाई अपिल गरेको छ । एक विज्ञप्ति जारी गर्दै काउन्सिलले स्थिर समय सुरु हुनुभन्दा अघिसम्म भएका राजनीतिक दलका कार्यक्रम, समाचार, तस्बिर, चुनाव चिन्ह अङ्कित झण्डा र ब्यानर, श्रव्य दृश्य लगायतका सामग्री मौन (स्थिर) अवधिमा सञ्चार माध्यमबाट प्रकाशनरप्रसारण हुँदा निर्वाचन आचारसंहिता उल्लङ्घन हुने भन्दै त्यस्तो कार्य नगर्न र नगराउन सम्बद्ध सबै पक्षसँग अनुरोध गरेको हो ।

निर्वाचन आचारसंहिता लागु भएपछि काउन्सिलले गरेको अनुगमनका क्रममा आचारसंहिता विपरीतका सामग्री सम्प्रेषण गर्ने सञ्चार माध्यमलाई बिहिबार २४ घण्टे स्पष्टीकरण सोधेको काउन्सिलका उपप्रशासकीय अधिकृत रामशरण बोहराद्वारा जारी विज्ञप्तिमा जनाइएको छ ।

अनुगमनका क्रममा कतिपय सञ्चार माध्यमबाट चुनावी विश्लेषणका नाममा ‘‘।।राम्रो मतान्तरसहित जित्ने सम्भावना’, ‘‘‘।अग्रता’ जस्ता शीर्षकमा स्थलगत अध्ययनको दाबी सहितका कुनै राजनीतिक दल र उम्मेदवारको पक्ष पोषण हुने गरी सामग्री सम्प्रेषण भएको पाइएपछि काउन्सिलले त्यस्ता सञ्चार माध्यमलाई २४ घण्टे पत्र काटेको हो ।

काउन्सिलले सञ्चार माध्यम, आमपत्रकार, सञ्चारकर्मी, सामाजिक सञ्जालका प्रयोगकर्तालाई आचारसंहिता पालनामा थप संवेदनशील, सजग र सचेत रहन अपिल गर्दै निर्वाचन स्वच्छ, मर्यादितरूपमा सम्पन्न गर्न सघाउन भनेको छ । यही वैशाख १० गते आइतबार बारा क्षेत्र नं। २, चितवन क्षेत्र नं। २ र तनहुँ क्षेत्र नं। १ मा प्रतिनिधिसभा सदस्यको उपनिर्वाचन हुँदैछ ।