दिउँसै सुनको सिक्री लुटपाट गर्ने व्यक्ति पक्राउ

काठमाडौं । प्रहरीले सुनको सिक्री लुटपाटमा संलग्न चार जनालाई पक्राउ गरेको छ । पक्राउ पर्नेमा काठमाडौं, बागबजारका सुरज गुरुङ, पर्सा जिल्ला, वीरगञ्ज १७ का अनवर हुसेन अन्सारी, भारत पश्चिम बंगाल घर भएका शक्ति भौमिक र भारत महाराष्ट्रका सचिन गाड्वे रहेका छन् ।

प्रहरीका अनुसार गत भदौ २५ गते बेलका ५ बजेको समयमा कुलेश्वर आवास क्षेत्र नजिकै सडकमा पैदल हिँडिरहेकी अफ्सरा श्रेष्ठको घाँटीमा रहेको अन्दाजी २ तोला बराबरको सुन सिक्री उनीहरुको मिलेमतोमा चोरी भएको थियो ।

उक्त सिक्री अनवरले तानेका थिए भने सुरजले मोटरसाइकल चलाएका थिए । शक्तिले उक्त सिकी विक्री गर्न सघाएका थिए भने सचिनले उक्त सिक्री खरिद गरेका थिए ।