वीरगन्ज । सशस्त्र प्रहरी बल पर्साले एकै दिन २४ लाख रुपैयाँ बराबरको भन्सार छलीका विभिन्न सामान बरामद गरेको छ । सशस्त्र प्रहरी बल नं. १३ गणले कुर्ता सुरुवाल, थानको कपडा, काँस जस्तो देखिने धातु र प्याज बरामद गरेको हो ।

सशस्त्र प्रहरी उपरीक्षक किशन कर्मचार्यका अनुसार वीरगन्ज महानगरपालिका २ भकुवामा सशस्त्रको गाडी मोबाइल टोलीले भारतबाट चार जनाले टाउकोमा बोकेर ल्याइरहेको ५ लाख ३२ हजार रुपैयाँ बराबरको कपडा बरामद गरेको थियो ।

सोही टोलीले वीरगन्ज १ छठघाट नजिकै ६९ हजार को कपडा बरामद गरेको थियो । यसैगरी सशस्त्र प्रहरीको गस्ती टोलीले पर्साको विन्दवासिनी गाउँपालिका ३ झौवाबाट करिब ७० हजार मूल्य बराबरको काँस जस्तो देखिने धातु बरामद गरेको थियो ।

सशस्त्र प्रहरीले चोरी तस्करी गरि १७ लाख मूल्य बराबरको प्याज सहित प्रदेश २–०३ च ५४८९ नम्बरको पिक अप गाडी समेत नियन्त्रणमा लिएको छ । आवश्यक कारवाहीका लागि भन्सार छलीका सामान वीरगन्ज भन्सार कार्यालय पठाएको सशस्त्र प्रहरीले जनाएको छ ।