काठमाडौंको तापक्रम घट्दो, तराईमा ‘हाई क्लाउड’

काठमाडौं । काठमाडौं उपत्यकामा चिसो बढ्दो क्रममा रहेपनि आज तराईले भने केहि राहत महसुस गरेको छ । केहि दिन अघिदेखि क्रमशः घट्दै गएर हिजो न्यूनमत तापक्रम २.२ मा झरेको काठमाडौंको तापक्रम आज त्यसभन्दा पनि तल झरेर २.१ डिग्रीमा आएको छ ।

यस्तै आइतबार तराईले भने केहि राहत महसुस गरेको छ । उच्च बादल अर्थात् पातलो बादल (हाई क्याउड) देखिएकाले तराईमा हुस्सु मात्रै रहेको तर बाक्लो कुहिरो नदेखिएकाले केहि न्यानो महसुस भएको छ । यो हाई क्लाउडले पानी भने नपार्ने मौसमविद् बताउँछन् ।

मौसमविद्का अनुसार भिजिबिलिटी एक हजारभन्दा तल भएमा कुहिरो लाग्ने र त्यसभन्दा माथि भएमा हुस्सु भन्ने गरिन्छ । तराईमा आज केहि राहत मिल्ने तर जनजीवनमा भने चिसोले असर नै पार्ने भएकाले सचेत हुन आग्रह गरिएको छ । कतैकतै हुस्सु तथा कुहिरो पनि रहने बताइएको छ ।

हिजो भने तराईका अन्य क्षेत्रको ‘भिजिबिलिटी’ अलि धेरै रहेपनि नेपालगञ्ज र धनगढीमा बाक्लो थियो । त्यहाँ तीन सय मिटरसम्म झरेको मौसमविद् बताउँछन् । उच्च पहाडी भेगमा केहि मौसम बदली रहेको र हिमाली क्षेत्रमा हिमपात भने जारी नै रहेको छ ।

हाल नेपालमा पश्चिमी वायुको आंशिक प्रभाव रहेको छ । देशको पहाडी भूभागमा आंशिक बदली रही बाँकी भूभागमा मुख्यतया सफा रहेको छ । देशका तराईका केहि स्थानमा हुस्सु लागेको छ ।

राति कोशी, बागमती, गण्डकी र कर्णाली प्रदेशको पहाडी भूभागमा आंशिकदेखि साधारणतया बदली रही बाँकी भूभागमा आंशिक बदलीदेखि मौसम मुख्यतया सफा रहने जनाइएको छ ।

कोशी, बागमती, गण्डकी र कर्णाली प्रदेशको उच्च पहाडी तथा हिमाली भूभागका एक दुई स्थानमा हल्का हिमपातको सम्भावना रहेको छ । सोमबार दिउँसोको अवस्थामा पनि उस्तै रहने जनाइएको छ ।