तीन चिनियाँ अन्तरिक्ष यात्री तियानगोङ अन्तरिक्ष स्टेसन पुगे

 काठमाडौँ । चीनले फेरि एक पटक अन्तरिक्ष क्षेत्रमा ठूलो सफलता हासिल गरेको छ । चाइना म्यान्डेड स्पेस एजेन्सीका अनुसार, चीनको अन्तरिक्ष यान शेन्झाउ-२० ले बिहीबार राति अबेर तीन अन्तरिक्ष यात्रीहरूलाई लिएर अन्तर्राष्ट्रिय अन्तरिक्ष स्टेशनसँग सफलतापूर्वक जोडिएको छ । यी तीन जना स्टेशन भित्र पुगेका छन् र त्यहाँ पहिले नै उपस्थित आफ्ना सहकर्मीहरूलाई भेटेका छन्, जो विगत छ महिनादेखि त्यहाँ काम गरिरहेका छन् ।

यसअघि शेन्झाउ-२० उत्तरपश्चिम चीनको जिउक्वान प्रक्षेपण केन्द्रबाट प्रक्षेपण गरिएको थियो । यसलाई सरकारी टिभी च्यानलले प्रत्यक्ष प्रसारण गरेको थियो । अन्तरिक्ष यानमा तीन अन्तरिक्ष यात्री चेन डोङ, चेन झोङरुई र वाङ जी छन् । यो टोली अक्टोबरको अन्त्यमा पृथ्वीमा फर्कनेछ ।

चीनले प्रत्येक छ महिनामा आफ्नो तियाङगोङ स्टेशनमा तीन सदस्यीय टोली पठाउँछ । अघिल्लो टोली अप्रिल २९ मा पृथ्वीमा फर्कने अपेक्षा गरिएको छ । शेन्झाउ-२० चीनको मानवयुक्त अन्तरिक्ष कार्यक्रमको ३५औं उडान हो र स्टेशनको विकास चरणको पाँचौं अभियान हो ।

यसका साथै, चीनले पहिलो पटक दुई पाकिस्तानी अन्तरिक्ष यात्रीहरूलाई तालिम दिने निर्णय गरेको छ । तीमध्ये एकलाई पेलोड विशेषज्ञको रूपमा मिसनमा समावेश गरिनेछ ।

यस विषयमा जानकारी दिँदै चाइना म्यान्डेड स्पेस एजेन्सीका प्रवक्ता लिन झिकियाङले यो नयाँ टोलीले अन्तरिक्षमा जेब्राफिस, प्लानेरियन र स्ट्रेप्टोमाइसेसमा जीवन विज्ञानसँग सम्बन्धित प्रयोगहरू गर्नेछ । पहिलो पटक प्लानेरियन नामक प्राणीलाई चीनको स्टेशनमा ल्याइएको छ, जसले आफ्नो अंगहरू पुन: उत्पन्न गर्न सक्छ । चीनले यो स्टेशन अन्तर्राष्ट्रिय अन्तरिक्ष स्टेशनमा समावेश नभएको बेला निर्माण गरेको थियो, किनभने पश्चिमी देशहरूलाई चीनको अन्तरिक्ष कार्यक्रम उसको सेनाले सञ्चालन गरिरहेको डर थियो । यद्यपि, अब चीनसँग संसारको एक मात्र सक्रिय स्वतन्त्र अन्तरिक्ष स्टेशन रहेको छ ।