काठमाडौं । आइएमई डिजिटल सोलुसन लिमिटेड र खल्ती प्राइभेट लिमिटेड एक आपसमा गाभिएर अब ‘आइएमई खल्ती लिमिटेड’ नामबाट एकीकृत रूपमा कारोबार गर्ने भएका छन्। दुवै कम्पनीबीच २०८१ फागुन ४ गते मर्जरको प्रारम्भिक समझदारी भएको थियो भने २०८१ फागुन २२ गते नेपाल राष्ट्र बैंकले मर्जरका लागि सैद्धान्तिक सहमति दिएको थियो।
मर्जर प्रक्रिया अघि बढ्दै २०८२ वैशाख २५ गते अन्तिम सम्झौता भएपछि राष्ट्र बैंकमा निवेदन पेश गरिएको थियो। सोही आधारमा २०८२ असार ४ गते राष्ट्र बैंकले औपचारिक स्वीकृति दिएको हो।
कम्पनी रजिष्ट्रारको कार्यालयले पनि खल्तीलाई आई.एम.ई. डिजिटलमा गाभ्ने अनुमति प्रदान गरेको छ। नयाँ कम्पनीको नाम ‘आइएमई खल्ती लिमिटेड’ रहनेछ भने यसको केन्द्रीय कार्यालय काठमाडौंको पानीपोखरीमा रहनेछ।
अब नयाँ एकीकृत कम्पनीले २०८२ साउन १ गते बिहीबारदेखि कारोबार सुरु गर्ने छ। मर्जरपछि खल्ती प्राइभेट लिमिटेडको सम्पूर्ण सम्पत्ति र दायित्व आई.एम.ई. डिजिटल सोलुसन लिमिटेडले ग्रहण गर्ने व्यवस्था गरिएको छ।
