NRNA SCC ACT का लागि Joint Secretary पदमा उम्मेदवारी दिएका मदन राज सिग्देलले प्रवासी राजनीतिमा विचार, आत्मसम्मान र उत्तरदायित्वका आधारमा विकल्प प्रस्तुत गर्ने घोषणा गरेका छन्। हालै सामाजिक सञ्जालमार्फत सार्वजनिक गरिएको लामो अभिव्यक्तिमा उनले राजनीतिक रङभन्दा माथि उठेर समुदायको हितमा सोच्नुपर्ने आवश्यकता औंल्याएका छन्।
उनले लेखेका छन् — “Politically literate छु, तर politically engaged छैन।” उनका अनुसार प्रवासमा गरिने राजनीति यदि समुदायको प्रतिष्ठा र पहिचानमाथि प्रतिकूल असर पार्ने खालको हुन्छ भने, त्यसप्रति आफू स्पष्ट रूपमा विरोधी रहने बताउँछन्। उनले प्रवासको गरिमा कुनै पनि नेताको ढोकामा गएर वा कुनै वादको प्रचार गरेर स्थापित नहुने दाबी गर्दै, आत्मनिर्भर, विवेकी र जिम्मेवार नेतृत्वको आवश्यकता रहेको उल्लेख गरेका छन्।
राजनीतिक चेतनाको सन्दर्भमा उनले बीपी कोइराला, किसुनजी, तुलसी गिरी, गणेशमान सिंह, मदन भण्डारी, पुष्पलाल श्रेष्ठलगायत नेताहरूका विचारप्रति प्रभावित भएको उल्लेख गरेका छन्। त्यस्तै, छिमेकी मुलुकका माओत्सेतुङ, देङ सियाओ पिङ, महात्मा गान्धी, नेहरु, प्रशान्त किशोरजस्ता नेताहरूको सोच, उदय र असफलता पनि आफूले नियाल्दै आएको जानकारी दिएका छन्। “Not well educated but informed” भनेर आफूलाई चिनाउँदै, राजनीति आफ्नो सौख नभए पनि गहिरो चासो भएको बताउँछन्।
उनले चिनियाँ नेता देङ सियाओ पिङको भनाइ उद्धृत गर्दै लेखेका छन् — “बिरालो कालो होस् वा सेतो, उसले मुसा मार्न सक्नुपर्छ।” उक्त सन्दर्भमा उनले आफूसँग समुदायको हितका लागि काम गर्नसक्ने योग्यता र आत्मविश्वास रहेको प्रष्ट पारेका छन्। रङ, झन्डा वा समूहभन्दा बाहिर रहेर, विचार र कार्यदक्षताको आधारमा मूल्याङ्कन हुनुपर्ने उनको धारणा छ।
डिजिटल प्रविधिमा निर्भर नभई आफ्नै आत्मबल र साहसका साथ नेतृत्वको विकल्प प्रस्तुत गरिरहेको उल्लेख गर्दै उनी भन्छन् — “म च्याटजिपिटीका प्रम्प्ट र रेस्पोन्समा आफ्नो एजेन्डा खोजेर आएको होइन। म साँचिकै भर्खराउँदो ऊर्जा, आत्मबल र दृष्टिकोण लिएर आएको हुँ।”
अन्त्यमा, उनले मतदाताहरूसँग आग्रह गर्दै भनेका छन् — “बाँकी त, जुन रङ तपाईंलाई मनपर्छ, त्यहीँ रङ मानेर मत दिनुहोस्। मेरो रङ त आफैंमा श्यामश्वेत हो — जस्तो चस्मा लगाउनुभयो, त्यस्तै देखिन्छु।”
NRNA Australia को आगामी निर्वाचन यही जुलाई २६ तारिखका दिन सम्पन्न हुने तय भएको छ। NRNA Scc Act Joint Secretary पदका उम्मेदवार मदनले व्यक्त गरेको विचारशील अभिव्यक्तिले प्रवासी राजनीतिमा वैचारिक बहस र वैकल्पिक नेतृत्वप्रति नयाँ संवादको खाका कोरेको देखिन्छ ।
