ठमेलमा ‘एक्स ओ क्लब’ सञ्चालनमा

काठमाडौं । काठमाडौंको ठमेलमा ‘एक्स ओ क्लब’ सञ्चालनमा आएको छ। करिब ३० करोड रुपैयाँको लगानीमा बनेको यो क्लबलाई नेपालकै नाइट लाइफ क्षेत्रमा नयाँ अध्यायको रूपमा लिइएको कम्पनीको दाबी छ ।

क्लबमा नेपालमै पहिलोपटक एड्म्सन ब्रान्डको साउण्ड सिस्टम जडान गरिएको छ, जुन क्यानडाली अडियो इन्जिनियर कार्लोस सालाबेरी ले ट्युन गरेका हुन्।

अत्याधुनिक लाइटिङ, साउण्डप्रुफिङ र प्रविधिमार्फत यहाँ आउने संगीतप्रेमीलाई पूर्णतया डुबाउने अनुभव दिने उद्देश्य राखिएको क्लब व्यवस्थापनले जनाएको छ ।

एक्स ओ क्लबको प्राविधिक पक्षसँगै यसको सञ्चालनमा संलग्न टोली पनि उच्च स्तरको रहेको बताइएको छ । क्लबको नेतृत्व टिम एक्सएलका संस्थापक शशिन्द्र चित्रकारले गरेका छन् भने, प्रोजेक्ट स्टुडियो प्रोडक्सनका संस्थापक तथा ख्यातिप्राप्त अडियो इन्जिनियर विनय अमात्य प्राविधिक पक्षमा संलग्न छन्।

करीब १०० जनाको टोलीको मेहनतमा निर्माण भएको यस क्लबलाई नेपाल मात्र नभई दक्षिण एशियाकै उत्कृष्ट नाइट क्लब बनाउने लक्ष्य राखिएको व्यवस्थापनको दाबी छ। साथै, क्लबलाई संगीतप्रेमीहरूको प्रमुख गन्तव्य बनाउने लक्ष्य लिइएको छ।