आज रिहा हुँदै रवि लामिछाने

काठमाडौं । राष्ट्रिय स्वतन्त्र पार्टीका (रास्वपा)का सभापति रवि लामिछाने आज अदालतमा बिगो रकम बुझाएर तारेखमा जेल मुक्त हुने भएका छन् । उच्च अदालत तुलसीपुरको बुटवल इजलासले लामिछानेलाई बिगो बराबरको जमानत लिएर रिहा गर्न आदेश दिएपछि उनलाई आज रुपन्देही जिल्ला अदालतमा उपस्थित गराएर छोड्ने तयारी भइरहेको छ । लामिछानेलाई आवश्यक बैंक जमानत पहिले नै बुझाइसकेकाले अब प्रशासनिक प्रक्रिया मात्रै बाँकी रहेको छ।

यसअघि लामिछानेले जिल्ला अदालतमार्फत जमानतमा छुट्न बैंक ग्यारेन्टी पेश गरेका थिए । तर जिल्ला अदालतले त्यस्तो आधारमा रिहा गर्न नमिल्ने ठहर गर्दै माग अस्वीकार गरेको थियो । जिल्ला अदालतको निर्णयपछि उनी सोही विषय लिएर उच्च अदालत पुगेका थिए ।

अदालतले उनलाई रिहा गर्न आदेश दिँदा चार वटा प्रमुख सर्तहरू अघि राखेको छ । जसअनुसार जिल्ला अदालतले २०८१ माघ १३ मा पुर्पक्षका लागि रिहा गर्दा माग गरेको रु एक करोड धरौटी रकम कायमै राख्ने, लामिछानेले आफ्नो भागमा पर्न सक्ने भन्दै बुझाएको रु दुई करोड ७४ लाख ८४ हजार रकम स्वीकार गर्ने, अदालतबाट अन्तिम फैसला हुँदा त्योभन्दा धेरै दायित्व सिर्जना भए थप रकम तिर्ने मन्जुरीको कागज गराएर लामिछानेलाई थुनामुक्त गर्ने र लामिछानेलाई व्यक्तिगत वा संस्थागत रूपमा विदेश यात्रा गर्नुपरेमा अदालतलाई पूर्वजानकारी दिनुपर्ने सर्तहरू राखेको छ । लामिछाने हाल नक्खु कारागारमा छन्।