बागमती नदीमा फोहोर संकलनका लागि ट्रास बेरियर जडान

काठमाडौं । शहरी विकास मन्त्रालय अन्तर्गतको अधिकार सम्पन्न बागमती सभ्यता एकीकृत विकास समितिले काठमाडौंका नदीमा तैरिने फोहोर संकलन गर्न ट्रास बेरियर जडान थालेको छ। हाल गुह्वेश्वरीमा जडान सम्पन्न भइसकेको छ।

बागमती नदीका गोकर्ण ब्यारेज, गुह्वेश्वरी, तिलगंगा आँखा अस्पताल, बागमती–मनोहरा दोभान, यूएन पार्क तथा मनोहरा नदीको कर्मनाशा दोभानमा गरी ६ स्थानमा ट्रास बेरियर राखिनेछ। यसका लागि ६५ लाख रुपैयाँको ठेक्का सम्झौता भई काम तीव्र गतिमा भइरहेको छ।

ट्रास बेरियरले प्लास्टिक, पोलिथिन, बोतल, काठका टुक्रा लगायत तैरिने फोहोर रोक्दै नदीको बहाव अवरुद्ध नगरी एकै स्थानमा संकलन गर्नेछ। संकलित फोहोरको नियमित व्यवस्थापनबाट नदी प्रदूषण न्यूनीकरण, सौन्दर्य अभिवृद्धि, जलजीव संरक्षण र सार्वजनिक स्वास्थ्यमा सकारात्मक प्रभाव पर्ने अपेक्षा गरिएको छ।