रिलायन्स स्पिनिङ मिल्सको आईपीओ आज बाँडफाँड, ५ लाखभन्दा बढी आवेदकको हात खाली

काठमाडौं । रिलायन्स स्पिनिङ मिल्स लिमिटेडले सर्वसाधारणका लागि निष्कासन गरेको प्रारम्भिक सार्वजनिक निष्कासन (आईपीओ) आज बाँडफाँड गर्दैछ । पुस ७ देखि ११ गतेसम्म खुलेको यस आईपीओमा मागभन्दा झण्डै ३३ गुणा बढी आवेदन परेको छ ।

कम्पनीका अनुसार ५ लाख ८३ हजार ८९६ आवेदकले ३ करोड ५ लाख ४ हजार ८ सय कित्ताका लागि आवेदन दिएका छन् । उपलब्ध शेयर सीमित भएकाले यो आईपीओ केवल १८ हजार ९४५ जनालाई मात्र पर्नेछ भने आवेदन दिएका ५ लाख ६४ हजार ९५१ जनाको हात खाली हुने भएको छ ।

बुक–बिल्डिङ विधिमार्फत जारी गरिएको यस आईपीओमा आम लगानीकर्ताका लागि प्रति शेयर ८२० रुपैयाँ ८० पैसामा शेयर निष्कासन गरिएको थियो । कम्पनीले सर्वसाधारणका लागि ९ लाख २४ हजार ७६८ कित्ता शेयर जारी गरेको हो ।

यसअघि १ लाख १५ हजार ५९६ कित्ता शेयर विदेशमा कार्यरत नेपाली नागरिकहरूलाई बाँडफाँड गरिएको थियो । कुल १० लाख ४० हजार ३६४ कित्तामध्ये ५७ हजार ७९८ कित्ता म्युचुअल फन्डका लागि र ५७ हजार ७९८ कित्ता कम्पनीका कर्मचारीहरूका लागि छुट्याइएको छ । यस आईपीओको निष्कासन तथा बिक्री प्रबन्धक ग्लोबल आइएमई क्यापिटल रहेको छ ।

सर्वोत्तम सिमेन्ट लिमिटेडपछि बुक–बिल्डिङ विधिबाट आईपीओ जारी गर्ने रिलायन्स स्पिनिङ मिल्स नेपालकै दोस्रो कम्पनी बनेको छ । २०५१ सालमा दर्ता भएको यो कम्पनी हाल ४३ सयभन्दा बढी कर्मचारीसहित सञ्चालनमा रहेको छ । सुनसरीको खनार र दुहबीमा दुई उत्पादन एकाइ रहेका कम्पनीले पलिएस्टर, भिस्कस र एक्रिलिक धागो उत्पादन गर्दै भारत र टर्कीलगायत देशमा निर्यात गर्दै आएको छ ।